A portavoz do BNG no Congreso, Olaia Fernández Davila, presentou unha pregunta por escrito na Cámara para pedirlle explicacións pola decisión de non considerar entidade sistémica a NCG.
Davila alude á resposta por escrita ofrecida por Almunia á comisión de investigación sobre a fusión das caixas galegas, na que sinala que as autoridades españolas, incluíndo ao Ministerio de Economía e Competitividade, o Banco de España e o FROB estabeleceron cais das entidades baixo reestructuración e con necesidades adicionais de fondos públicos debían ser consideradas sistémicas.
Por que NCG non e Bankia si?
É dicer, subliña a deputada do BNG, parece evidente que a responsabilidade sobre a consideración de entidades sistémicas recaeu exclusivamente sobre o Goberno español. Nese sentido, a parlamentar nacionalista lembra a intención do FROB de vender nos próximos meses NCG e Catalunya Banc.
Ambas entidades sairán á venda nun breve periodo de tempo mentras que a outra entidade nacionalizada, Bankia, non seguirá o mesmo curso porque o Goberno a declarou sistémica. Una decisión que para o BNG foi arbitraria e carente de obxectividade posto que NCG é unha entidade sistémica para Galiza.
Critica a deputada do BNG os criterios utilizados polo Goberno español para declarar sistémica ou non a unha entidade nacionalizada porque non son nada claros, son opacos e parecen obedecer máis a intereses doutra índole. Á luz dos feitos é evidente que se actuou de maneira discriminatoria e baixo o prisma recentralizador nun ámbito no que tamén se está a defender o poder financeiro da capital do Estado.
Actitude centralista e discriminatoria do Goberno do PP
Estas son as razóns polas que Davila formula ao Goberno unha batería de preguntas: É verdade que a decisión de non considerar entidade sistémica a NCG foi adoptada en exclusiva polas autoridades do Estado español sen intervención da UE? De ser así, Por que motivo decidiu o Goberno español non declarar sistémica á NCG? Por que se declarou sistémica a Bankia? Acaso NCG non é unha entidade sistémica para Galiza?.
A deputada do BNG pide ao Goberno que dea explicacións sobre os criterios estabelecidos para declarar sistémica ou non a unha entidade nacionalizada. Seguen pautas obxectivas? Que requisitos hai que cumprir para ser declarada entidade sistémica?.
Reprocha ao Goberno que teña unha actitude discriminatoria por aplicar esta cualificación a unha entidade de implantación na capital do Estado mentras se rexeita para entidades que pertencen a outros territorios como Galiza e Catalunya. Por que se defende con tanto empeño a unha entidade nacida e estabelecida especialmente en Madrid, e por que tanta presa por vender unha entidade moi implantada na Galiza?.
