A portavoz do BNG no Congreso, Olaia Fernández Davila, pediu a Montoro claridade en relación a Bárcenas: Beneficiouse ou non da amnistía fiscal porque o seu avogado di que si.
O titular de Facenda comparecía esta mañá na Comisión correspondente do Congreso para dar conta dos resultados da amnistía fiscal aprobada polo PP. A deputada do BNG dixo a Montoro que vosté está aquí hoxe por unha situación estraordinaria polo escándalo político do seu partido que se está seguindo en toda a sociedade con alarma. O telón de fondo, Señor Ministro, son as supostos prácticas corruptas do partido que substenta ao Goberno e a amnistía fiscal.
Davila pediu ao Ministro de Facenda que debe ser o máis claro posíbel para que a cidadanía o poida entender. E cando fala de que entre os fondos aflorados había fondos lícitos, ilícitos e outros baixo proceso xudicial, é necesario que aclare cantos foron lícitos, cantos ilícitos e cantos están suxeitos a procesos xudiciais, dadas as circunstancias existentes.
Aclare: Bárcenas beneficiouse ou non? porque o seu avogado mantén que si
A parlamentar nacionalista demandou a Montoro aclaracións sobre se Bárcenas se beneficiou ou non da amnistía fiscal porque o avogado do Señor Bárcenas di que si, que se acolleu á amnistía. E os inspectores de Facenda din que non teñen posibilidade de acceder aos dados dos suxeitos amnistiados, mentras que vosté di que si. Explique isto con claridade.
Dada a gravedade da situación, sinalou a deputada do BNG, o Goberno ten que facer unha investigación através de Facenda. Ademáis reprochou a Montoro a aprobación no seu día da amnistía fiscal que desde logo non está a dar os resultados que dixeron no seu día. A realidade demostra por que o BNG votou en contra desa lei.
A portavoz do BNG no Congreso destacou que os problemas do PP non son alleos a todo isto xa que é o partido que substenta ao Goberno. O Executivo ten que tomar medidas e asumir responsabilidadees, e a dimisión forma parte diso.
Davila avisou a Montoro que de non aclarar ben todos estes aspeitos, a cidadanía acabará pensando que vostés adaptan as leis para amparar a evasores fiscais e que lle toman o pelo aos cidadáns coas súas explicacións que non din nada. Vosté omite a verdade que é igual que mintir.
http://youtu.be/Ue0ecKuCybk
