O BNG votou a favor da constitución dunha Comisión de Investigación das caixas galegas, que verá a luz no Parlamento Galego nos próximos meses.
Porén, o portavoz de Economía do BNG, Carlos Aymerich lamentou que o PP non admitise unha emenda do BNG para que o traballo da Comisión non se quede nunhas conclusións e, pola contra, ao igual que no caso de Islandia, vaia máis alá e implique cambios no sistema financeiro e tamén no sistema político e social.
En concreto, a emenda presentada polo BNG pedía uns obxetivos claros e precisos para a Comisión de Investigación:
- Analizar a evolución económico-financeira das antigas caixas de aforros.
- Analizar as causas e responsabilidades, políticas e directivas, da súa situación.
- Analizar as responsabilidades polo mantemento dos antigos directivos nos seus postos e pola aprobación das indemnizacións que percibiron.
- Esclarecer as responsabilidades pola fraude masiva das participacións preferentes e outros híbridos financeiros.
- Esclarecer as responsabilidades pola situación actual da obra social.
- Analizar o impacto que sobre o emprego tivo a bancarización das antigas caixas.
O PP quere controlar a fundación que xestionará o pouco que queda das caixas galegas
Por outra parte, o BNG votou hoxe en contra no Pleno do Parlamento Galego da toma en consideración da iniciativa do PP para converter Novacaixagalicia nunha Fundación. E é que para o portavoz de Economía do BNG a proposición de lei do Partido Popular chega tarde e mal, pois o seu obxectivo é controlar a Fundación que xestionará o patrimonio que queda das caixas galegas.
En concreto, o deputado do BNG criticou que o PP presenta esta proposición de lei para modificar a Lei de Caixas de Galiza de forma precipitada o 28 de xullo porque xa non podían tapar máis as súas vergoñas, especialmente despois de que o 24 de xullo a Fiscalía presentara unha querela contra os ex-dirixentes das caixas galegas.
Ademais, Aymerich reprochou as formas con que o PP presentou esta iniciativa, tarde e mal e sen consuala cos traballadores da obra social das caixas nin cos demáis grupos parlamentares.
O PP quere controlar a obra social que queda das caixas galegas
Porén, para o parlamentario nacionalista o máis grave é que con esta lei o PP quere consolidar o seu control sobre a Fundación e sobre Novacaixagalicia, pase o que pase nas próximas eleccións galegas.
Así, o articulado da proposición de Lei promovida polo Grupo Popular garántelle ao PP o nomeamento de 7 dos 12 membros do Padroado da Fundación e a duración do seu mandato é indeterminada.
Ademais, Carlos Aymerich criticou que non se garante nin a orientación nin o mantemento da obra social.
