O Bloque Nacionalista Galego solicitou esta mesma mañá a demisión do alcalde de Lugo, o socialista José Clemente López Orozco, como consecuencia da súa imputación xudicial na chamada operación Pokemon. En declaracións aos medios de comunicación, o voceiro do BNG no Concello de Lugo e tenente alcalde, Antón Bao, explicou que esta decisión foille transmitida persoalmente esta mañá ao propio alcalde.
En declaracións aos medios de comunicación na propia Casa do Concello e acompañado pola tamén concelleira nacionalista Paz Abraira, Antón Bao, afirmou, en sintonía co expresado xa esta mesma mañá polo portavoz do BNG no Parlamento Galego, Francisco Jorquera, que o Bloque Nacionalista Galego considera que por hixiene democrática cada cada vez que se produce unha imputación dun cargo público, a persoa afectada debe dimitir, sen que isto prexulgue a culpabilidade ou non da persoa imputada, dixo. É máis, Bao reiterou que o BNG defende o dereito á presunción de inocencia de todo o mundo.
En relación a se esta decisión implica a saída do BNG do Goberno municipal, o voceiro nacionalista aclarou que nos vindeiros días o Bloque Nacionalista Galego reunirá aos seus órganos de dirección locais e aos militantes do BNG na cidade de Lugo para analizar a situación e tomar unha decisión ao respecto. Con todo, Antón Bao deixou claro que a petición de demisión ao alcalde non implica unha decisión nun ou noutro sentido e reiterou que será a militancia do BNG a que decida.
Finalmente, o voceiro nacionalista explicou que tanto os motivos da imputación do alcalde como os feitos investigados polo Xulgado no Concello de Lugo en relación a este caso corresponden a mandatos anteriores nos que o BNG non estaba no Goberno do Concello. A operación Pokemon investiga asuntos que son anteriores á entrada do BNG no Goberno municipal e polo tanto nada teñen que ver coa xestión do concelleiro e a concelleira do Bloque neste Goberno, quixo deixar claro Antón Bao. O Bloque Nacionalista Galego xestiona no actual Goberno municipal de Lugo dúas áreas de Goberno: Cultura, Turismo e Promoción da Lingua e Infraestruturas e Axenda 21.