O Bloque Nacionalista Galego apoia as mobilizacións convocadas pola Confederación Intersindical Galega na defensa do sistema público de pensións e mostra a súa oposición á nova reforma anunciada polo Goberno do Estado. O deputado do BNG no Congreso, Néstor Rego, defende garantir as pensións futuras e fortalecer o sistema público como único instrumento que garante que todos os traballadores e traballadoras, após toda unha vida de traballo, gocen do dereito ao descanso cunha pensión digna.
O BNG rexeita de maneira contundente a nova reforma das pensións impulsada polo Goberno español por ser unha proposta regresiva e porque suporá o recorte da contía das pensións futuras –máis de 6%- pola vía do aumento do período de cálculo dos 25 a 30 anos.
O deputado nacionalista lembra que xa na anterior crise económica ese período foi aumentado de 15 a 25 anos. “O BNG reclama que volva a ser reducido e que se permita aos traballadores e traballadoras escoller os mellores anos para que non haxa ningunha perda de capacidade adquisitiva das pensións futuras” reivindica Rego.
![](/media/bnggaliza/images/2023/02/01/2023020112525547771.jpg)
“A reforma do Goberno está feita ao ditado das exixencias da Unión Europea e supón un novo recorte social que de ningunha maneira podemos permitir” avanza Néstor Rego. Neste sentido, o BNG, para alén de ter presentado numerosas iniciativas no Congreso, está apoiando todos os movementos sociais que se manifestan en contra da reforma como as mobilizacións convocadas nas diferentes vilas e cidades do País pola Confederación Intersindical Galega (CIG).
O deputado do BNG no Congreso ten claro que, de ningunha maneira a frente nacionalista apoiará medidas que poñan en risco o sistema público de pensións “nin que sirvan para recortar as pensións futuras dos traballadores e traballadoras”. En opinión de Néstor Rego o que hai que facer é “garantir as pensións futuras e fortalecer un sistema público que é o único instrumento que pode permitir que todos os traballadores e traballadoras, após unha vida de traballo, teñan un merecido dereito ao descanso cunha pensión digna”.
Rego denuncia o Goberno por levar a cabo unha política de precarización e privatización nas pensións, tal e como se pode apreciar nas últimas reformas aprobadas, como a introdución e promoción dos plans de pensións de empresa e mesmo a substitución do “factor de sustentabilidade” que implantar o PP polo novo “factor de equidade interxeracional” que poderá ter os mesmos efectos negativos, ao tempo que se penaliza a xubilación anticipada incluso con largas carreiras de cotización e se alonga a idade de xubilación. Neste sentido, o deputado nacionalista considera decepcionante a política en materia de pensión do Goberno de coalición español e urxe a dar un xiro nas accións desenvoltas até o momento. O deputado nacionalista recorda que, tal e como se comprometera en campaña electoral, o Goberno debe “derrogar a reforma das pensións feita polo PP e subir as pensións mínimas xunto co Salario Mínimo Interprofesional”.