Os parlamentares do BNG, Olaia Fernández Davila e Francisco Jorquera, rexistraron unha proposición non de lei no Congreso para que o Goberno do Estado permita que as seleccións deportivas galegas poidan participar en competicións internacionais.
Ademáis, instan ao Executivo español a apoiar a posibilidade de as federacións galega, catalana e vasca se integraren directamente nas entidades internacionais competentes, realizando as modificacións normativas e organizativas necesarias para facilitar dita integración:
O BNG sinala que o pleno desenvolvemento do deporte galego fai preciso que os combinados deportivos galegos poidan intervir e competir no plano estatal e internacional como xa o fan as representacións deportivas doutras nacións europeas.
As sentenzas favorábeis do Tribunal Constitucional
Neste sentido, hai que salientar a decisión do Tribunal Constitucional que se coñeceu onte e que avala a lei de seleccións catalanas e desestima o recurso de inconstitucionalidade que presentara en 1999 o Goberno do PP na época de Aznar.
O BNG tamén lembra a recente sentenza do Tribunal Constitucional sobre o recurso presentado polo Goberno central contra a lei do Deporte basco e que abre a porta á posibilidade legal de que as federacións galegas representen o deporte galego en todos os ámbitos.
Galiza ten competencias exclusivas en promoción deportiva. Por tanto, as seleccións galegas deben poder competir no mundo sen límites
Os parlamentares nacionalistas galegos consideran que a prohibición da presenza internacional das seleccións deportivas de Galiza, Euskadi e Catalunya carece de base constitucional e é, simplesmente, resultado dun esquema político centralista, de dubidoso encaixe coa competencia exclusiva de Galiza en materia de promoción deportiva.
Ademáis, poñen de manifesto que a presenza dunha única selección deportiva por cada Estado non é unha norma obrigatoria a nivel internacional. Ao contrario, en diversos Estados constátase a existencia de distintas seleccións nacionais, en consonancia co seu carácter plurinacional.
Para o BNG é xa momento de romper complexos, de rematar coas visións pechadas que non se corresponden cos tempos nos que vivimos e superar esquemas políticos doutros tempos. Consiste en dar normalidade democrática ao mundo do deporte.