A parlamentaria do BNG, Carme Adán defende prezos de enerxía inferiores para os consumidores como compensación aos custes medioambientais e sociais que soporta o territorio galego
A portavoz de Industria do BNG, Carme Adán defende reducir nun 30% as peaxes do sistema eléctrico e insta á Xunta a demandar do Goberno do Estado a derrogación do Artigo 38 que obriga aos consumidores e consumidoras ao pago dun suplemento pola xeración e transporte da enerxía eléctrica en Galiza
Na presentación da Proposición non de lei en rolda de prensa, en sede parlamentaria, Adán pediu que se abarate o recibo da luz porque estamos producindo entre un 30% ou 40% máis de enerxía da que consumimos e os custes medioambientais e sociais desta actividade deben ser compensados explicou.
Graves custes medioambientais e sociais pola xeración de electricidade en Galiza
A parlamentaria nacionalista lembrou que no territorio galego foron asolagados vales, implantáronse parques eólicos nos seus montes, destruíronse núcleos de poboación e as actuais liñas de alta tensión seguen provocando importantes custes sociais polo que considerou que estas circunstancias deben ser compensadas coa redución dun 30% nas peaxes que os galegos e galegas pagamos no recibo da luz.
Por outra parte, afirmou que a aplicación do artigo 38 abrirá a porta ao incremento do recibo eléctrico en Galiza ao gravar cun novo imposto aos consumidores daqueles territorios que produzan electricidade.
Esta situación, dixo, fai necesario que nunca que a Cámara galega debata a iniciativa nacionalista que cualificou de equilibrada e razoable e que na súa opinión, debe contar co apoio do resto dos grupos parlamentares para seren aprobada por unanimidade.
A deputada lembrou que en período electoral o BNG pediu a eliminación das peaxes que supoñen a metade da factura eléctrica polo que reiterou o abaratamento do recibo da luz.
O Plan de reestruturación de Paradores prexudica gravemente aos traballadores galegos do sector
A preguntas dos xornalistas sobre EREs ás plantillas de traballadores dos paradores galegos, a portavoz de Industria, Enerxía e Turismo do BNG afirmou que ao peche definitivo de dous emblemáticos paradores en Galiza e futuros peches parciais no resto hai que sumar o mal momento do turismo no nos país polo que instou á Xunta de Galiza a paralizar este plan de reestruturación en Galiza e buscar unha saída contra a redución de espazos culturais e de patrimonio así como a eliminación dos postos de traballo.