A deputada do BNG no Congreso, Rosana Pérez, rexistrou dúas solicitudes de comparecencia urxente da Ministra de Sanidade e Asuntos Sociais, Ana Mato, para que veña á Cámara a explicar que medidas vai adoptar para garantir a asistencia ás miles de persoas en situación de dependencia.
A parlamentar nacionalista quer que Ana Mato explique que vai facer para asegurar o financiamento necesario ás organizacións e asociacións que se ocupan de persoas en situación de dependencia e que vai facer para evitar que a necesaria Lei de Dependencia desapareza como terceiro piar básico do Estado de Benestar.
"Cos seus salvaxes recortes, lévanos á marxinación social"
Nunha segunda solicitude, Rosana Pérez pide que a Ministra de Asuntos Sociais informe das previsións financeiras en relación á Lei de Dependencia debido á situación de exclusión social, empioramento da situación de moitas persoas dependentes e marxinación social á que esta a conducir os recortes do Goberno de Rajoy en servizos sociais nos dous últimos exercicios orzamentarios.
A deputada do BNG alude ás movilizacións e manifestacións que distintos colectivos de discapacitados e persoas en situación de dependencia están levando a cabo porque se están a producir casos verdadeiramente dramáticos e inhumanos. O Goberno debe escoitar a voz de alarma de miles de persoas con dependencia, de colectivos e organizacións que traballan cos afectados.
