A viceportavoz do BNG, Olalla Rodil avanzou os asuntos que o BNG levará a vindeira sesión plenaria no debate final dos Orzamentos tras rematar o trámite de emendas parciais e despois de que o Partido popular rexeitara 604 propostas para mellorar a sanidade pública galega, incrementar as pensións non contributivas e destinar 1 de cada 100 euros a loitar contra a violencia machista.
“O PP négase a reforzar o Servizo de Axuda no Fogar, recuperar dereitos laborais do profesorado, mellorar a calidade educativa no ensino galego e mellorar os servizos públicos e as condicións de vida das galegas e dos galegos”, criticou a deputada
A xuízo da viceportavoz do BNG, os orzamentos “non responde ás necesidades deste País”, non responden aos graves problemas que arrastra nin enfronta os retos de futuro. O PP, unha vez máis, persiste en “inzar de anuncios e cheques electorais para tentar con desesperación, amarrar o goberno que se lle vai das mans”, reiterou.
Rodil afirmou que “as galegas e galegos non se venden por un bono para mercar un chándal ou para ir de cruceiro”. A xente deste país o que quere é ter un médico que os atenda cando enferman, sentenciou.
Rematado o pleno de Orzamentos, explicou a nacionalista, dará comezo o pleno ordinario ao que levamos tres asuntos no que consideramos pode ser “o último pleno da lexislatura”.
A portavoz do BNG, Ana Pontón, na sesión de control ao presidente, preguntará a Rueda que balance fai destes 14 anos de Goberno do Partido popular, como cre que se atopan hoxe as galegas e galegos? Ou se melloraron as nosas condicións de vida, se hai mellores servizos públicos e máis benestar que no ano 2009 coa chegada do PP á Xunta.
Reforma da lei para votar aos 16 anos
No avance dos debates propostos polo BNG, destacou a proposición de lei de reforma da lei de eleccións ao Parlamento de Galiza co obxectivo de mellorar a calidade democrática e ampliar dereitos como o “voto aos 16 anos” ademais de introducir, como mínimo, dous debates durante a campaña electoral entre as principais forzas políticas.
Hoxe, recalcou Rodil a ninguén se lle escapa que os debates xogan un papel decisivo nos procesos electorais e a sociedade galega quere coñecer a través deles as propostas que defende cada opción política. “Queremos blindar por lei ese dereito das galegas e galegos a coñecer e a contrastar proxectos políticos”.
Ampliar o dereito do voto aos 16 anos.
A nacionalista xustificou esta petición argumentando que a esa idade calquera mozo ou moza pode “traballar, casar se está emancipado ou emancipada, conta co recoñecemento da maioría de idade sanitaria, é responsable penalmente dos seus actos” e mesmo pode acceder a ter unha licencia de armas para ir de cada, e dicir “pode ir ao monte cunha escopeta e matar un xabaril pero non meter unha papeleta nunha urna”.
Con 16 anos non tes dereito a voto. Non podes participar de maneira activa nun proceso electoral no que se decide o teu futuro e dende o BNG, queremos “recoñecer a capacidade para decidir politicamente a partir dos 16 anos como acontece en Austria, Brasil, Arxentina e nalgún länder alemán como o de Bremen”.
Asemade, agregou a deputada do BNG, tamén levaremos ao pleno unha pregunta urxente sobre a situación de Alcoa San Cibrao despois do anuncio da empresa de que non reactivará o forno da planta de aluminio en 2024.
“Esta planta xera centos de postos de traballo e representa unha parte fundamental do PIB de toda a provincia de Lugo” e o Goberno galego debe dar unha resposta sobre o futuro da planta e dos seus traballadores e traballadoras, concluíu.
