A portavoz nacional, Ana Pontón, avanzou que o BNG levará ao Parlamento unha batería de iniciativas para que Galiza conte realmente cun ensino inclusivo de calidade que atenda á diversidade e “non deixe a ningún neno ou nena atrás”, primeiro, revertendo os recortes no profesorado especialista e de apoio do Goberno do PP.
Por iso, a primeira proposta que o Bloque trasladará á Cámara é o incremento do número de profesores e profesoras dos centros educativos e do persoal específico d apoio ao alumnado con necesidades especiais, así como o reforzo dos departamentos de orientación, incorporando máis especialistas.
De igual xeito, defenderá a mellora da formación do persoal docente no ámbito da inclusión e o desenvolvemento de plans e programas que sexan estables para complementar as necesidades educativas do alumnado máis vulnerable.
Cuestións todas elas que Pontón considerou fundamentais para poder ter un sistema educativo de calidade, “que non segregue ao alumnado en función das súas capacidades, senón que que realmente sexa un sistema inclusivo onde todos os nenos e nenas con discapacidade ou sen ela teñan os recursos que necesiten para desenvolver todo o seu potencial”, recalcou.
A portavoz nacional anunciou esta batería de iniciativas logo da reunión que mantivo cos representantes da federación Down Galiza, cos que analizou os grandes déficits do sistema educativo na atención aos nenos e nenas con necesidades educativas especiais, un encontro no que tamén participou a portavoz parlamentaria de Educación, Cristina Fernández.
Neste sentido, a líder nacionalista advertiu que, “pese á propaganda do Goberno de Rueda”, seguen sen cumprirse as ratios de profesorado por número de alumnado con necesidades específicas de apoio educativo en todos os cursos, salvo en cuarto de Educación Infantil, o único no que houbo avances.
“Tamén vemos como, pese á propaganda oficial, o programa Acompaña de apoio e reforzo do alumnado con necesidades educativas especiais non resolveu os problemas de déficit de profesorado”, engadiu logo de recordar as mobilizacións de familias e comunidade educativa neste sentido dende o inicio de curso e que aínda se manteñen a día de hoxe.
A pesar desa mesma propaganda do Executivo do PP, tampouco se respectan os informes de orientación de cada centro que sinala unhas necesidades educativas que, advertiu, “a consellería non está cubrindo”, co agravante de que moitos destes orientadores e orientadoras teñen que atender varios centros á vez, o que dificulta e retrasa tamén a valoración das necesidades que teñen nenos e nenas.
Pontón puxo o foco sobre o alumnado que está vivindo a peor situación, o que necesita un apoio e seguimento dentro das aulas por parte dunha persoa especialista en pedagoxía terapéutica. “Moitos dos centros do noso País carecen deste apoio que é imprescindible para a integración real, para que os nenos e nenas que teñen algún tipo de discapacidade poidan seguir o mesmo ritmo educativo que os seus compañeiros e compañeiras de clase”, advertiu.
Uns déficits que coinciden cos sinalados pola federación Down Galiza, cuxos representantes trasladaron á portavoz do BNG un informe coas incidencias que están detectando nese curso escolar e no que sinalan os recortes de profesorado especialista e de apoio. “Falta moito camiño por percorrer para que haxa unha educación realmente integradora e inclusiva”, concordou a líder nacionalista cos representantes da federación, para subliñar a continuación que hoxe en día “hai moitos nenos e nenas con necesidades educativas especiais que non teñen o apoio que necesitan”.
Neste sentido, tamén recolleu as denuncias da Down Galiza sobre a derivación cada vez maior de nenos e nenas con necesidades específicas a centros de educación especial, o que vulnera o dereito a unha educación inclusiva, ou que, de manterse no centro educativo, pasen cada vez máis tempo en aulas específicas e non na aula compartida, o que vai en contra da convención dos dereitos das persoas con discapacidades.
Pontón advertiu ademais sobre o feito de que, segundo a federación, estes nenos e nenas están recibindo materiais seleccionados que non están acordes co desenvolvemento curricular do centro escolar ou que sofren a súa exclusión nos tempos de recreo, pola ausencia de mediación para xerar dinámicas lúdicas que permitan a súa integración.
“A integración vai moito máis alá de que os nenos e as nenas estean xuntos na mesma aula, ten que haber os mecanismos suficientes para atender a esa diversidade e que ningún neno ou nena deste País quede atrás”, alegou para urxir ao Goberno de Rueda a poñer sobre a mesa solucións reais, na vez de propaganda. “Que os nenos e nenas con necesidades especiais teñan os recursos que necesitan é a mellor contribución que podemos facer á sociedade”, indicou para concluír que “cada euro que se inviste na educación é o mellor investimento que se pode facer no presente e no futuro das sociedades”.
