A Banca Pública Galega é a única fórmula para evitar que as decisións sobre Novagaliciabanco, como sobre o resto dos bancos nacionalizados, se vaian tomar por parte do Banco Central Europeu, isto é, por parte de Alemaña.
Así o afirmou esta mañá en conferencia de imprensa o portavoz nacional, Guillerme Vázquez, logo de manter unha reunión coas direccións galegas de UXT e CC OO, organizacións ás que o BNG deu traslado da súa proposta de Banca Pública Galega.
Nesta reunión, alén de Guillerme Vázquez, fixeron parte da delegación do BNG a secretaria de Organización, Montse Prado; o secretario de Acción Social, Rafa Vilar; e o membro do Consello Nacional Xavier Vence. Pola súa parte, as delegacións de UXT e CC OO encabezáronas José Antonio Gómez e Mabel Pérez, secretario xeral e secretaria da Muller, Políticas de Igualdade, Inmigración e Cooperación ao Desenvolvimento, respectivamente.
A BPG, unha proposta realista
O portavoz nacional presentou a proposta dunha Banca Pública Galega como a forma máis realista de contar cunha institución financeira vinculada ao territorio e capaz de fornecer crédito a empresas e particulares -crédito que hoxe non existe pola vía da banca privada. A BPG sería tamén, a xuízo do líder nacionalista, unha fórmula indispensábel para evitar que se consume o espolio do aforro galego e mesmo para voltar a xerar confianza entre as aforradoras e aforradores, que neste momento non se fían en absoluto das entidades privadas.
A Banca Pública Galega é tamén a única alternativa fronte ao insensato deseño dos gobernos Feijóo e Rajoy que apostan pola megaconcentración bancaria e a descentralización territorial.
Un deseño que pasa por entregar a capacidade de decisión sobre o sistema financeiro e sobre os bancos nacionalizados, entre eles NGB, a instancias aínda máis lonxanas de Galiza, ao Banco Central Europeu, isto é, a Alemaña.
Alemaña ten a chave
Alertou Guillerme que na recente cimeira europea o que se pactou é precisamente iso: entregar a Alemaña a chave para que sexa ela quen dirixa a reordenación do sistema financeiro no conxunto do UE. Dito doutro xeito: as decisións sobre o aforro galego se tomarían xa non en Madrid, senón en Berlín.
A única forma de lle dar volta a ese deseño é apostarmos pola Banca Pública Galega, razoou Guillerme, quen salientou que Galiza, con Feijóo na presidencia, leva camiño de ficar sen ningún instrumento financeiro propio. O Pastor foi absorbido polo Popular e Novagaliciabanco xa todos vemos como está, dixo.
Favorábel acollida social
Guillerme mostrou a súa convicción de que a proposta de Banca Pública Galega que lidera o BNG se irá abrindo paso no seo da sociedade galega. Estamos a obter unha moi favorábel acollida en todas as reunións e contactos cos axentes sociais. Hoxe tamén, dixo, a respeito do encontro das direccións galegas de UXT e CC OO.
As decisións sobre o aforro galego se tomarían xa non en Madrid, senón en Berlín
De por parte, o portavoz nacional quixo referirse tamén á nova ofensiva antisocial dos gobernos galego e español.
Soben o prezo da luz, das medicinas, do butano, nun contexto de baixa de salarios e pensións. Continúa o espolio da xente, afirmou, ao tempo que denunciou que este mesmo mes vai entrar en vigor o novo canon da auga, cunha fortísima subida. De media as facturas que pagan os cidadáns subirán arredor dun 150 por cento, alertou.
O Goberno Feijóo está a facer certo coas súas políticas de recortes a afirmación que fai o BNG de que o Rescate á Banca é un Saqueo ao Pobo, dixo Guillerme.
O portavoz nacional criticou tamén con dureza a nova andanada contra as competencias autonómicas anunciada onte por Rajoy. Reducir o gasto das comunidades autónomas é tanto como reducir o gasto en sanidade e educación, o gasto en servizos sociais, que é no que pensa o PP seguindo os ditados da troika, cuestionou Guillerme, quen advertiu de que o Goberno Rajoy pensa tamén en liquidar a Lei de Dependencia.
