O Grupo Municipal do BNG da Coruña levará ao Pleno ordinario de xullo unha moción na que esixe a retirada do título honorífico de fillo predilecto a José Luis Méndez, ex director xeral de Caixa Galicia, pola súa pésima xestión á fronte da entidade financeira.
O portavoz nacionalista Xosé Manuel Carril, acompañado pola concelleira Ermitas Valencia, debullou esta mañá en rolda de prensa os motivos que levaron o BNG a solicitar que se revogue esta distinción, concedida polo seu prestixio e consideración xeral, polas súas destacadas cualidades persoais e, singularmente, polos seus servizos en beneficio, mellora e honor da cidade e que foi aprobada na derradeira Xunta de Goberno Local en que era alcalde da Coruña Francisco Vázquez, o 17 de febreiro de 2006 e ratificada no Pleno da Corporación municipal o 3 de abril de 2006.
Pasados seis anos, o BNG considera que Méndez non é merecente do título de fillo predilecto, temos información suficiente da xestión que tivo á fronte de Caixa Galicia e as súas consecuencias ruinosas, polo que mantelo como fillo predilecto da cidade só daría unha mala imaxe da Coruña.
Pésima xestión
A concelleira Ermitas Valencia expuxo que a crise económica sacou á luz a pésima xestión da banca, unha xestión que agora temos que sofrer todos e todas a través dos graves recortes que suporán os famosos rescates. A crise tamén sacou á luz que as caixas galegas, en vez de cumprir o que ditaba a lei e así promover a economía e a cultura galegas, se dedicaron a especular co ladrillo, apuntou.
Méndez contribuíu a alimentar a crise co furado inmobiliario de Caixa Galicia
A nacionalista salientou que tal e como no 2006 o Concello se facía eco do apoio popular e da suposta boa xestión de quen era o cabeza visíbel de Caixa Galicia, o Concello ten que se facer eco do malestar da cidadanía e da mala xestión de Méndez á fronte da entidade. Non esquezamos que, en parte, o ex director contribuíu a alimentar a crise co furado inmobiliario de Caixa Galicia, engadiu.
Valencia insisitiu en que con feitos máis que probados e con razóns máis que suficientes é de xustiza retirarlle este honor ao ex director de Caixa Galicia. Precisamente, o Estado español tivo que solicitar o rescate bancario á Unión Europea ante a falta de fondos para sanear as entidades financeiras nacionalizadas: Bankia, Catalunyacaixa, mais tamén NCG Banco, sociedade anónima herdeira de Caixa Galicia e Caixanova. A xestión de José Luis Méndez López como Director Xeral de Caixa Galicia levou o Estado español a necesitar un rescate externo, denunciou.
Nepotismo e 16,5 millóns de indemnización
Carril afondou nas condutas reprobábeis de Méndez que levaron o BNG a solicitar a revogación do título de fillo predilecto. Os abusos durante a súa xestión á fronte de Caixa Galicia son hoxe máis que coñecidos entre a poboación, poderíamos citar algúns como o nepotismo, colocando os seus fillos nos máis altos postos directivos da caixa, mais, sobre todo, o cobro de indemnizacións multimillonarias, cando a entidade xa recibira inxentes axudas públicas e cando a sociedade xa estaba sufrindo a crise económica, exemplificou.
O prezo que pagou a antiga Caixa Galicia para poder dicirlle adeus a quen durante 29 anos ocupou a Dirección Xeral foi un retiro de 16,5 millóns de euros, apuntou. Engadiu Carril que o plan de pensión e a indemnización cobrada por José Luis Méndez foron as máis altas recibidas por un alto cargo dunha caixa no Estado español.
Corresponsábel da desaparición de Caixa Galicia
O nacionalista, que lembrou que A Coruña foi durante moitas décadas capital financeira de Galiza e a actuación de Méndez e doutros directivos de entidades financeiras levaron a que a cidade deixara de ser cerne do sistema financeiro galego, salientou que a mala xestión de Méndez supuxo a desaparición de Caixa Galicia e que a súa sucesora, Novacaixagalicia e Novagalicia Banco, teñan que ser rescatadas con inxentes recursos públicos.
A este respecto, Carril afirmou que a entidade tivo que recibir cando se fusionou con Caixanova 1.162 millóns de euros e tivo que recibir outros 2.465 millóns de euros cando foi transformada en banco. Así, engadiu que o sobreendebedamento da entidade, o alousa da sobre-exposición no sector inmobiliario e as participacións empresariais erróneas (incluso escandalosas coma as súas relacións con ASTROC), levaron a desaparición da Caixa de Aforros de Galicia.
Grave riscos para o emprego
A continuación, o portavoz do BNG no Concello da Coruña puxo de manifesto que os desinvestimentos en empresas asentadas na Coruña nas que participaba a Caixa Galicia e que tivo que afrontar a entidade para sanear os excesos cometidos durante a xestión de Jose Luis Méndez supoñen un grave risco para a continuidade de numerosas empresas na cidade, algunha delas xa pechadas.
Nesta liña, Carril advertiu de que a pésima xestión do director xeral derivou nunha destrución de emprego directo en Caixa Galicia e nas empresas auxiliares ou participada. E tamén provocou o despedimento de milleiros de profesionais na Coruña polo estrangulamento do crédito ao que someteu as compañías coruñesas, engadiu.
Os beneficios da obra social, no peto de accionistas privados
Non esqueceu o portavoz nacionalista das graves consecuencias que terá para a cidadanía a desaparición da caixa, porque os beneficios que revertían na sociedade a través da obra social rematarán, no mellor dos casos, nos petos dos accionistas privados.
Carril explicou que o futuro a obra social verase prexudicada coa ampliación de capital precisa para acudir ao rescate da UE. O mesmo sucede coa Obra asistencial, como por exemplo coa Residencia situada na Cidade Vella da Coruña, que foi transferida a Eulen e que no futuro non dará asistencia de balde ás persoas máis necesitadas, alertou. Tamén criticou o nacionalista os grandes mausoleos de dubidosa rendiblidade social e que hipotecan o futuro da obra social.
Méndez e a estafa das preferentes
Ademais, Carril advertiu de que Méndez encubriu a súa mala xestión incrementando a solvencia da entidade, colocando produtos complexos á clientela e traspasándolle o risco á mesma. Hoxe milleiros de pequenos aforradores e aforradoras están atrapados na arañeira das participacións preferentes, sinalou.
Precisamente, ao rematar a rolda de prensa, a concelleira Ermitas Valencia participaba na concentración que cada xoves organizan os afectados e afectadas pola fraude das preferentes, aos que o BNG, desde as distintas institucións en que conta con representación, apoia.