Ana Pontón critica o optimismo do Goberno de Feijóo ante os datos do IGE que confirman o retroceso da lingua galega
A deputada do BNG, Ana Pontón censurou hoxe a política lingüística da Xunta e o optimismo do Goberno ante os datos do Informe do IGE que confirma o retroceso no uso do galego.
Ante os medios de comunicación en sede parlamentar, a deputada asegurou que o resultado do informe confirma un menor uso en Galiza da lingua galega e para o BNG é unha mala noticia. Estamos, dixo, asistindo a unha lenta e paseniña morte do noso idioma e resulta inaudito que ante esta situación, a Xunta de Galiza faga unha valoración positiva.
Esas declaracións só se entenden por parte dun Goberno que ten renegado e traizoado os galegos e galegas e a noso idioma e que claramente aposta por unha política lingüística xenocida.
A deputada anunciou que o BNG presentará iniciativas no camiño de do debate na Cámara galega sobre o idioma, ademais de rexistrar novas iniciativas parlamentarias sobre o incumprimento do Plan de Normalización da Lingua galega.
Neste sentido, tachou de esperpéntico que a próxima semana no Parlamento galego teña lugar un acto para conmemorar o Plan de Normalización da lingua galega cando en realidade ese plan está soterrado.
É unha tristura, dixo comprobar como no Goberno galego hai persoas que atacan o idioma galego e impiden a súa normalización.
