A portavoz nacional, Ana Pontón, elixiu a estación ferroviaria de Guixar en Vigo para reclamar que Galiza non quede atrás nos deseños ferroviarios de transporte por mercadorías e para darlle un impulso real a un asunto estratéxico para o futuro, explicou a líder do BNG que citaba a valoración que a propia UE.
“Dicía un ex comisario europeo de transportes que quen non figure na rede transeuropea de transporte será un cero á esquerda e non podemos permitir que Galiza, na práctica, quede fora deses deseños, estamos ante un feito clave para a competitividade da nosa economía, e o Bloque non vai aceptar que a visión centralista que cada vez ten máis peso no Estado faga que Galiza quede atrás”, argumenta.
E para iso, a líder nacionalista formula propostas que permitan pasar das palabras aos feitos.
En primeiro lugar, propón unha fronte de País onde estean institucións, empresariado, sindicatos, organizacións políticas e universidades en defensa da infraestrutura. Segundo, un Plan extraordinario de investimentos para o corredor atlántico, no seu tramo noroeste, acompañado dun cronograma que defina proxectos e prazos de execución. E para que evitar erros do pasado, “porque de promesas incumpridas sabemos moito en Galiza, imos impulsar a creación dunha comisión interinstitucional que inclúa ao Goberno galego, o goberno central e todos os axentes implicados nesta infraestrutura”, explicou.
Pontón destaca que os feitos acumulados ao longo da última década neste asunto da motivos para a alarma, esgrimindo os datos que mostran a discriminación do goberno central dun e outro signo.
“Basta de anuncios, queremos feitos”, indicou, porque hoxe “a porcentaxe de transporte ferroviario de mercadorías no Estado é aproximadamente o 4%, mentres en Galiza é inferior; e obxectivo anunciado o pasado venres en Santiago é chegar ao 12% no noroeste en 2040, unha proposta moi pouco ambiciosa tendo en conta que a media en Europa é xa do 16,8% e países como Alemaña ten xa o 23%”.
Polo tanto, alegou, o corredor atlántico precisa un impulso porque Galiza leva unha década de retraso e discriminación con Galiza, e aí están os datos.
“En 2013 o corredor atlántico quedou excluído do mapa, por certo cos votos do PP e do PSOE en Bruxelas, vimos como o corredor mediterráneo conta con un comisionado desde 2017, mentres que para o corredor atlántico acaba de anunciarse dunha maneira efectista, xa veremos se efectiva, e vimos como nos últimos anos a maioría dos investimentos se concentraron en Madrid, Andalucía e Euskadi”.
Ademais, o Bloque subliña que mentres o corredor mediterráneo ten un cronograma e un plan director claro, en Galiza só hai anuncios e indefinición, “inaceptable nunha infraestrutura estratéxica para a competitividade da nosa economía, porque o tren é o transporte de futuro, un medio máis ecolóxico, eficiente e máis barato”.
Conexión con Portugal
Pontón destacou a importancia do corredor atlántico para Vigo, en particular para o seu porto, “referente de entrada de mercadorías por mar que precisa a conexión ferroviaria” e, igualmente puxo o foco na PLISAN, como gran polo loxístico o que implica que debe ter garantida a conexión por tren, aínda pendente.
Outra cuestión pendente é a conexión con Portugal, e o BNG considera clave acelerar os proxectos e os investimentos da conexión a través do Eixo atlántico entre Galiza e o país luso, a nova liña de alta velocidade entre Vigo-Braga-Porto e a mellora do transporte de mercadorías a través da liña actual que vai a Porto por Viana do castelo, concluíu.
