A eurodeputada do BNG, Ana Miranda, participou hoxe na Comisión de Pesca do Parlamento Europeo, na que fixo fincapé na importancia do traballo das mulleres do mar, desde mariscadoras, redeiras, traballadoras da conserva ou vendedoras de peixe. Ademais, explicou que o sector síntese “abandonado” porque non é consultado “debidamente”.
“As mulleres da pesca cumpren unha función fundamental”, subliñou a eurodeputada galega, quen lle fixo entrega á directora xeral de Pesca da UE, Charlina Vitcheva unha camiseta das “Redeiras en perigo de extinción”, que segundo explicou lle deron hai pouco nunha visita ao porto da Guarda. “Vai vostede reactivar a Rede Aktea de mulleres da pesca? Que podemos facer desde a Comisión da Pesca?”, sinalou Miranda na súa intervención.
“Pregúntanos como vemos o futuro da pesca e eu suxiro que vaia hoxe a costa galega, xa que a frota non puido navegar polo mal tempo”, indicou a eurodeputada do Bloque en relación á intervención de Vitcheva, quen fixo unha valoración positiva do PPC, posición que non comparte o BNG. Pola contra, segundo Ana Miranda, o sector pesqueiro “síntese nun barco á deriva, abandonado, síntese só”, xa que segundo considerou o sector vése na situación de ter que aceptar unhas normas moi difíciles de cumprir “sen ser consultado debidamente”.
Perigo de extinción
Neste sentido Ana Miranda criticou que o sector se atopa na tesitura de ter que cumprir unhas “medidas drásticas que non teñen en conta o seu impacto socioeconómico, polo que se ve en perigo de extinción”, tanto no que respecta á pesca artesanal como a acuicultura ou a produción do mexillón.
“O sector da pesca en xeral vése só, porque se fala de moitas cifras, fálase de moitas estatísticas, pero desde a costa norte á costa sur o sector séntese só, porque non hai estatísticas que valgas cando a realidade é outra”, dixo en relación á baixada do prezo do peixe ou cando a frota non pode saír a faenar debido a decisións tomadas hai anos que se aplican posteriormente.
