A deputada nacionalista acusa ao CES de non aportar informes neutrais e independentes sobre a situación económica e social galega como marca a Lei polo que foi creado
Carme Adán afirmou hoxe, trala comparecencia da Presidenta do Consello Económico e Social, que esta institución non segue o espírito de neutralidade e independencia nos informes que debe realizar sobre as políticas económicas galegas e acusou a súa titular, Corina Porro de mentir sobre a austeridade no CES.
Falso Plan de axuste e austeridade no CES
Sobre esta cuestión, Adán criticou que a Presidenta do Consello Económico e Social afirmara que este plan de axuste responde aos tempos nos que estamos ao que a deputada do BNG preguntou se o Plan tamén se refire ao anexo de gastos de persoal cunha baixada do 3,1 recollido na memoria dos Orzamentos e ningunha baixada nos gastos de persoal e salarios da presidencia e do secretario xeral.
Adán incidiu en que mentres a presidencia e a secretaría xeral non experimentan unha baixada nos soldos, reducen os salarios do persoal laboral do Consello o que indica, afirmou, que a crise parece que non lle afecta a todos por igual.
A deputada do BNG acusou a Presidenta do Consello Económico e Social de mentir sobre este plan de axuste e denunciou que tampouco aparece reflectido nos orzamentos.
O CES non aporta informes para o desenvolvemento económico e social en Galiza
Na súa intervención, a nacionalista explicou que no ano 2012 textos lexislativos que modificaron as condicións d@s traballador@s da función pública, non pasaron por informes do Consello Económico e social e tampouco se produciu crítica algunha da Presidenta desta institución sobre o abuso na tramitación de urxencia ou lectura única para modificar aspectos fundamentais do desenvolvemento económico de Galiza como o referido a medidas temporais de emprego público ou a Lei de acompañamento dos orzamentos do 2012 que modificou substancialmente dereitos básicos para o emprego.
Adán instou á presidenta do Consello Económico e Social a analizar os Orzamentos para o ano 2013 porque , na súa opinión, inciden nunha maior recesión polo que se fai necesario un informe negativo dos mesmos por parte do CES.
A parlamentaria nacionalista lembrou que o propio presidente da Xunta de Galiza afirmou, na última campaña electoral, que este consello sería eliminado, intención, dixo que dende o BNG non compartimos porque cremos que debe dar sentido a Lei pola que foi creado debe ser neutral e imparcial e analizar a situación económica na que nos atopamos aportando propostas que incidan no autogoberno galego.