O deputada denuncia a falta de obxectivos contra a crise e parálise do sector eólico ante os cambios de normativa e inseguridade financeira
A deputada do BNG, Carme Adán fixo pública hoxe a posición do BNG fronte a proposta do PP de tramitar o proxecto de lei que modifica a regulación do aproveitamento eólico e crear o canon eólico e o Fondo de Compensación Ambiental.
A parlamentaria asegurou na súa intervención que a proposta do Partido popular non vai a verdadeira raíz dos actuais problemas do sector eólico en Galiza, nin mellora o contexto económico e de grande crise e parálise resultantes dos cambios normativos e inseguridade financeira xurídica.
A modificación da lei é un remendo administrativo do Partido popular
Para a nacionalista, o texto só pretende a través dunha modificación trasladar o depósito da fianza ao momento anterior ao inicio das obras e dada a hemorraxia do sector, tras o cambio regulatorio aplicado polo Partido popular, coloca ás empresas nunha difícil situación provocando mesmo a desincentivación de parques autorizados que non poderán iniciar as obras ante o desembolso da fianza.
Esta lei, dixo, é un remendo administrativo alleo á economía, á fiscalidade, ao emprego, á seguridade social ao transporte e a industria e enerxía. Por outra parte, engadiu, o propio Goberno admite o carácter administrativo do texto sen máis pretensións o que para nós representa o recoñecemento do fracaso do Goberno do Partido popular no deseño eólico.
A deputada pediu a devolución da proposta popular e denunciou a perda de posicións de Galiza no panorama eólico estatal dende o período do Goberno de Núñez Feijóo. A parlamentaria do BNG preguntou cómo se vai reducir a dependencia enerxética se non se constrúe o parque eólico para que entre en funcionamento. Resulta difícil de encaixar a ampulosidade da norma coa realidade concluíu.
Finalmente, a proposta de tramitación da lei do Partido popular para modificar o aproveitamento eólico en Galiza saíu adiante cos votos do PP e a abstención do PsdG-PSOE.
