Replica a Feijóo que a estabilidade das maiorías do PP trouxeron parálise e corrupción aos concellos que goberna
Coloca Rianxo, -coa loita en defensa do xeito ata Bruxelas-, como exemplo dun alcalde que acredita nas posibilidades deste país
O portavoz nacional no mitin de Rianxo fixo un chamamento a elixir a opción BNG-Asembleas Abertas centrándose en dous argumentos: o aval do traballo feito nos concellos alí onde goberna, libres de corrupción e a favor da xente, e a traxectoria histórica do Bloque en defensa do país.
Pedimos o apoio para un proxecto nacionalista que defende os intereses do país tamén desde os concellos, que sería de Galiza sen un nacionalismo como o que representa o BNG para defender o noso aforro, para defendernos do espolio, para defender o agro e a pesca, os nosos recursos enerxéticos, que sería deste país sen un nacionalismo que defendese a súa cultura e a súa lingua?, argumentaba.
O 24 de maio é a primeira oportunidade para derrotar ao PP e, nese sentido, fixo fincapé en que BNG-Asembleas Abertas é a única alternativa nacionalista de esquerdas que disputa terreo ao PP, palmo a palmo, en todo o país e non só nun puñado de cidades. Non somos unha improvisación de última hora, estamos na rúa ao lado da xente, non nos platós de televisión.
Durante o mitin, Vence, ironizou sobre a estratexia do PP alertando sobre as ensaladas de siglas en contraposición á suposta estabilidade das maiorías populares nos gobernos locais.
Descubrimos estes días que a Feijóo non lle gustan as ensaladas, dixire mellor as maiorías absolutas, as mesmas que durante catro anos encheron Santiago de corrupción e paralizaron a cidade, esa é a estabilidade que garanten as maiorías do PP, denunciou Vence.
Non queremos a estabilidade das augas mortas dos encoros, que permite negociar ao PP coas empresas amigas para entregarlles o 50% dos orzamentos dos nosos concellos, non queremos a estabilidade que lle permite ocultar a realidade e roubar en paz, criticou, no BNG-Asembleas Abertas queremos as augas vivas do mar da Arousa, queremos gobernos para transformar a realidade e construír país desde os concellos.
O dirixente nacionalista tamén atribuíu ao medo a perder o poder o cambio de discurso do presidente popular sobre os pactos entre partidos.
Como a conversión de Saulo camiño de Damasco, ou coa mesma firmeza que Groucho Marx nos seus principios, o señor Feijóo pasou de dicir que os pactos eran a peste a dicir que formaban parte do ADN do PP. O seus principios mudan cando ten medo a perder o poder municipal en moitas cidades e concellos do país, alegou.
Espirito de Riotorto
Apelou ao espírito de Riotorto para condensar o modelo de goberno en defensa dos servizos públicos, en lugar de privatizalos para beneficio dun grupo de lobbies madrileños, goberno a favor dos máis desfavorecidos fronte aos recortes do PP e limpos de corrupción.
Vence puxo como modelo de goberno nacionalista o traballo desenvolvido polo rexedor nacionalista e candidato Adolfo Muíños, exemplo de como se pode gobernar un concello cando ten ao fronte un alcalde e unha equipa que cree nas posibilidades deste país, defendendo con uñas e dentes aos sectores produtivos mesmo en Bruxelas como no caso do sector do xeito.
No mitin en Rianxo ademais de Muiños e Vence, tamén participaron candidatos de Boiro, Riberia e A Pobra.