Xiraldez reivindica o seu orgullo de canguesa e salienta a longa traxectoria de traballo do BNG pola veciñanza
Juncal defendeu unha estratexia para toda a comarca para que Bueu deixe de ser unha illa
Temos que encher a comarca do Morrazo de Bueus, concellos para a xente, transparentes, honestos, eficientes na xestión, que apostan polos servizos públicos, capaces de dinamizar a economía e o comercio local, concellos sociais que se poñen do lado dos que máis sofren, así é o concello de Bueu que lidera o compañeiro Felix e queremos que esa maneira de gobernar se estenda a Cangas, a Moaña, a Marín, a Vilaboa a partir do 24 de maio, proclamou o portavoz nacional, Xavier Vence, no mitin de BNG-Asembleas Abertas en Cangas.
Un mitin comarcal coa participación de Ornela Salgado, candidata por Vilaboa, Pilar Branco, por Marín, Leticia Santos, por Moaña, Felix Juncal, alcalde e candidato de Bueu, e Mercedes Xiraldez, candidata por Cangas.
O aval do traballo feito desde os concellos como o de Bueu foi o principal argumento do dirixente nacionalista para pedir o apoio a toda a veciñanza da comarca ás candidaturas do BNG-Asembleas Abertas.
Pedimos o apoio para un proxecto nacionalista que defende os intereses do país tamén desde os concellos, que sería de Galiza sen un nacionalismo como o que representa o BNG para defender o noso aforro, para defendernos do espolio, para defender o agro e a pesca, os nosos recursos enerxéticos, que sería deste país sen un nacionalismo que defendese a súa cultura e a súa lingua?, argumentaba.
Da saia remangada
A candidata a Alcaldía de Cangas, Mercedes Xiraldez, destacou o acto aberto da formación nacionalista porque estamos para dar a cara, para loitar por todos e todas neste concellos, voten ou non ao BNG. Reivindicou os seus orixes cangueses, dos da saia remangada e dos da punta do peirao, e salientou o papel da formación nacionalista a favor da veciñanza, porque temos unha longa traxectoria de traballo por Cangas.
Emprego e políticas de muller
Fixo unha lembranza da última vítima de violencia machista e reivindicou uns mellores servizos para a muller, que tamén son as que sofren a maior taxa de paro neste concello. Potenciar as políticas a favor da muller e a loita contra o desemprego, porque temos 3.000 parados entre os veciños e veciñas, como prioridades para o goberno. Neste sentido, criticou que o rexedor do PP, e outras marcas brancas, rexeitaran unha tras outra as propostas presentadas polo Bloque para xerar emprego. Onde estaba cando a Xunta denegou os obradoiros de emprego?, se preguntaba Xiraldez.
Igualmente fixo referencia a necesidade de contar con máis solo empresarial así como sacar adiante o plan xeral de urbanismo, agochado nun caixón polo PP. Dentro desa prioridade polo xeración de emprego, tamén subliñou a aposta incondicional ao comercio local, que dinamice as rúas e xera oportunidades de traballo.
Estratexia comarcal
Juncal lembrou cando Cangas, Moaña e Bueu conforman un núcleo de concellos con gobernos nacionalistas e instou a recuperar eses gobernos para conformar unha nova comarca próspera, libre dos recortes do PP, na que tamén se integren Marín e Vilaboa, porque en Bueu non temos vocación de ser unha illa.
Ornela Salgado expresou quere para o Morrazo concellos abertos, igualitarios, para vivir e traballar neles, parapetos ás políticas do PP, e quero que Vilaboa sexa un destes concellos, que por riba de todo teña ás persoas. O morrazo ten que volver a ser unha comarca liberada con cinco gobernos do BNG, concluíu.
Pilar Blanco aposta porque Marín deixeie atrás as vellas formas de facer política, baseada nos privilexios, corrupción e amiguismo. Tamén dende os concellos se pode construír futuro, demostrar que a nosa maior riqueza e o noso, paisaxe, xente, recursos, subliñou.
Leticia Santos, candidata por Moaña, aspira un concello no que poder vivir e traballar dignamente, sen que a xente nova coma min teña que resignarse a emigrar. Neste sentido, dixo, os concellos teñen que ser unha ferramenta para dinamizar a nosa economía, o comercio local das nosas vilas. Santos defendeu para Moaña un urbanismo responsable que non sexa un negocio, queremos ter uns servizos sociais que aposten polas persoas e as súas necesidades. Temos que ter un concello de verdade, de portas abertas para todos os veciños e veciñas, concluíu.
Todos os candidatos e candidatos de BNG-Asembleas Abertas defenderon sumar propostas e iniciativas, cooperando, para o conxunto da Comarca, para favorecer o seu dinamismo económico e darlle un futuro a xente moza e ao conxunto da veciñanza destes concellos.
