Quen sinta Galiza votará BNG-Asembleas Abertas, alega
Marca diferenzas con outras opcións: demostramos que sabemos transformar onde gobernamos e somos alternativa para toda a cidadanía
Nun escenario no que a porcentaxe de indecis@s está no 30%, o portavoz nacional, Xavier Vence, fixo un chamamento á participación activa o 24 de maio e pediu o apoio para un BNG-Asembleas Abertas que sempre te defende para evitar arrepentirse tras a noite electoral.
Temos que participar activamente o 24 de maio e apoiar un proxecto de transformación e de capacidade contrastada de goberno como é BNG-Asembleas Abertas, para darlle forza a quen sempre estivo ao lado da xente, por un proxecto fiable e seguro, na convicción de que apostando por ese proxecto o 25 non nos arrepentiremos, pediu Vence desde Vigo, nun acto co candidato nacionalista na cidade olívica, Serafín Otero.
O dirixente nacionalista instou a pasar a páxina negra de gobernos de recortes e corrupción optando por gobernos de transformación por todo o país que representa BNG-Asembleas Abertas, subliñando dúas diferenzas con outras opcións: demostrou que sabe facer esa transformación onde goberna, e presenta unha alternativa para todo o país, non só nun puñado de cidades.
Por iso, é moi importante aproveitar o 24M para dar un paso adiante e apoiar unha estratexia de transformación do país desde os concellos, non desaproveitar a oportunidade de que resultados inesperados podan deixar insatisfeitos a quen está desconforme coa política que se aplica desde arriba, tamén a nivel municipal, alegou.
Vence insistiu no dobre valor do voto BNG-Asembleas Aberta que, dixo, entende perfectamente o electorado que xa ten dado o seu apoio ao proxecto nacionalista.
O voto ao BNG non é para unha soa cidade, é unha opción para toda a cidadanía galega, unha alternativa para construír país desde os concellos. Todos e todas as que comparten a importancia de ter forzas políticas propias, de pensar Galiza como un todo, entende que é importante conseguir que BNG-Asembleas Abertas teñan unha representación forte, explicou.
De aí o dobre valor do voto a BNG-Asembleas Abertas, para derrotar ao PP e para construír país desde os concellos, concluíu.