Ironiza sobre a sintonía de Rajoy coa cidade ofrecendo a permanencia de ENCE na Ría, xusto o que a veciñanza quere
O portavoz nacional, Xavier Vence, colocou Pontevedra, a cidade do Lérez/a cidade do Lores, como emblema do modelo de goberno do Bloque Nacionalista Galego. O que se fai en Pontevedra non é unha excepción, é 100% BNG, é a guía do que queremos facer en todos os concellos do país, un modelo que implantamos alí onde gobernamos.
Vence subliñou o orgullo da remuda completa experimentada pola cidade grazas a solidez e coherencia do proxecto desenvolvido pola equipa que lidera Miguel Anxo Fernández Lores, levado adiante con valentía e coa participación e colaboración xenerosa de moita xente, veciños e veciñas. Que algúns se empeñen en negar os logros só pode obedecer a que os intereses os cegan, dixo.
O dirixente nacionalista salientou a sintonía de Lores ca xente da cidade, fronte a outros que se deixan caer en campaña, porque só ven Galiza como unha despensa de votos, en relación a Mariano Rajoy de mitin en Pontevedra.
Soltará a milonga da recuperación económica e cantará as excelencias da súa política de recortes, recortes en servizos básicos, recortes de salarios, recortes no benestar, recortes e recortes para a xente do común, a que ten contra as cordas. E para pechar a súa oferta electoral, dirá que Pontevedra non pode prescindir de ENCE!, ironizou para subliñar a sintonía do presidente do PP co sentir da cidade.
O 24M temos a oportunidade de seguir construíndo Pontevedra e lanzar unha mensaxe clara de rexeitamento ás políticas do PP, dixo, instando a quitar do medio o que representa un Feijóo sempre submiso a Madrid e as grandes empresas madrileñas, amigas de Rato, Aznar e Aguirre. Non fixo nada por Pontevedra, criticou, salvo enredar, como volve facer agora con Ence, porque parece que lle interesa a pasta.
Ninguén aposta máis pola industria do país co BNG, salientou, pero localizada onde corresponde, sen que contaminar unha ría rica para o marisqueo e o turismo.
Vence concluíu coa seguranza de que Pontevedra seguirá baixo o rumbo dun proxecto nacionalista tras o 24M e, máis pronto que tarde, coa Ría libre de ENCE.