BNG-Asembleas Abertas é a alternativa á vella política clientelar do PP e ao desgoberno dun PSOE perdido en liortas internas
García advirte que Vázquez aspira a ser o brazo executor dos recortes de Feijóo en Ourense, como xa fixo na Xunta coa Educación pública
O portavoz nacional, Xavier Vence, proclamou en Ourense que o 24 de maio é unha oportunidade para converter o concello de Ourense nun bastión contra o caciquismo asfixiante que exerce Baltar no conxunto da provincia.
Hai que recuperar Ourense para a xente, para que esta cidade e esta provincia deixen de ser consideras como a finca particular de ninguén, sen a política clientelar e corrupta que impón Baltar fillo, fiel herdeiro do seu pai con un único cambio: a boina polo twitter, ironizou o dirixente nacionalista.
A política que representa o PP en Ourense, -consentida por Feijóo a cambio dos votos-, é como un veleno de consecuencias letais que se traduce en despoboación, envellecemento, emigración, paro e parálise económica que deixa sen futuro a esta parte do país, advertiu Vence, onde os concellos son utilizados como ferramentas de control político e as administracións públicas como axencias de colocación de familiares e amigos políticos de Baltar.
Neste sentido, Vence denunciou o deterioro da democracia que o PP impón na provincia, que motivou a presentación dunha candidatura simbólica do BNG en Avión, como podíamos ter elixido moitos outros concellos da provincia, encabezada polo propio portavoz nacional e que pecha o portavoz parlamentario, Francisco Jorquera.
No mitin en Ourense, salientou que a candidatura BNG-Asembleas Abertas que lidera Susana García representa a alternativa de toda a cidadanía rebelde que non se resigna a elixir entre os partidos do réxime bipartidista que conforman PP e PSOE. Somos a alternativa á vella política clientelar do PP e ao desgoberno dun PSOE perdido en loitas internas e máis preocupado por defenderse das imputacións da xustiza que dos problemas da veciñanza.
BNG-Asembleas Abertas presenta unha candidatura renovada, de xente honesta e traballadora, cun proxecto político capaz de dar paso a unha nova etapa na cidade, subliñou.
A candidata Susana García advertía contra o candidato do PP, Jesús Vázquez, cuxa aspiración é converterse no brazo executor dos recortes de Feijóo en Ourense, como xa fixo ao seu paso pola Xunta nun servizo básico como a educación pública. Ourense non precisa recortes, precisa propostas e iniciativas concretas como as que presentou o BNG ao longo dos últimos anos, salientou García, tras instar a reflexionar sobre que ocorreu na cidade tras a nosa saía do goberno. Parálise e incompetencia, sintetizou.
García explicou que a prioridade de BNG-Asembleas Abertas será poñer os recursos orzamentarios do concello ao servizo da creación de emprego para traer de volta a xente moza, Ourense non pode construírse un futuro se expulsamos a nosa xuventude por falta de oportunidades de traballo, proclamou Susana García, quen tamén asegurou que encontrar emprego na cidade non pode depender da rede clientelar dos políticos de sempre.
A outra gran aposta é acadar un Ourense con servizos públicos e de calidade, freando as privatizacións,-caldo de cultivo da corrupción como se ten demostrado-, e pola remunicipalización progresiva a medida que vaian expirando as actuais concesións.
Finalmente, García comprometeu un Concello coas paredes de cristal, porque é a casa do pobo, a xente desta cidade ten que volver a recuperar o seu concello, que o sinta como a administración máis próxima, que dialoga e aporta solucións, explicou, un concello que aporte calidade de vida e do que sentirnos orgullosas, concluíu.