A deputada do BNG no Congreso, Rosana Pérez, presentou unha iniciativa parlamentar na Cámara Baixa dirixida ao Ministerio de Fomento para saber se se abriu unha investigación destinada a determinar as causas do naufraxio do bateeiro Paquito Nº 2 na zona de Corrubedo.
A deputada do BNG alude ao último accidente marítimo que se levou por diante outro barco pesqueiro o pasado 16 de decembro. Lembra a secuencia dos feitos desde que desapareceu o bateeiro, a aparición do cadáver do patrón, o dispositivo de busca dos outros dous mariñeiros desaparecidos e as estranas circunstancias do naufraxio.
Sospéitase que foi un golpe de mar. Había mar de fondo e o barco ía cargado con mexilón o que podería ter influido en que a súa liña de flotación estivese máis baixa que cando se navega sen carga. Durante todos estes días se buscou aos dous desaparecidos por terra, mar e ar pero sen resultado, sinala Rosana Pérez.
Fomento debe adoptar medidas
Rosana Pérez lamenta a situación porque o paso do tempo está a afectar a familiares e achegados dos dous mariñeiros. Sinala a deputada do BNG que o barco foi inspeccionado por submarinistas da Garda Civil e o Grupo Especial de Actividades Subacuáticas pero infructuosamente. Precisamente onte mesmo se fixeron novas inmersións e non atoparon nada.
A deputada do BNG quer saber se xa se vai descartar totalmente a posibilidade de poder realizar máis inmersións. Vaise continuar co dispositivo de busca? De ser así, até cando? Que medios se van empregar?.
En canto ao sinistro, pregunta se é verdade que non se activou ningunha alerta do Paquito Nº 2. Non houbo ningún aviso de socorro?. A deputada do BNG amosa a preocupación por tanto sinistro marítimo: Como é posíbel que no último ano e medio se teñan producido tantos accidentes con barcos pesqueiros? Que esta a fallar? Non considera Fomento que este constante suma e sigue de accidentes marítimos de pesqueiros debería provocar algunha reacción no Ministerio como un maior control?.
