A deputada do BNG no Congreso, Rosana Pérez, solicitou a comparecencia urxente do Ministros de Industria, José Manuel Soria, para que explique as razóns de ter aprobado a final de lexislatura o Real Decreto que regula o autoconsumo eléctrico, unha norma moi perxudicial.
Lembra Rosana Pérez que o BNG presentou alegacións ao proxecto de Real Decreto, que se sumaron a outras 38.000 rexistradas. O rexeitamento ao Decreto é maioritario e provén de todos os ámbitos, agás das empresas eléctricas, as únicas que están satisfeitas porque se penalizan as enerxías renovábeis e a produción enerxética propia.
A norma máis retrógrada da UE
A deputada do BNG censura unha norma que está definida como a máis retrógrada da UE por castigar duramente ao sector das enerxías alternativas, penaliza o autoconsumo e a produción eléctrica con destino ao autoconsumo. Por iso, pide a retirada do Real Decreto.
Salienta o feito de que uns 55.000 fogares producen enerxía através de placas solares fotovoltaicas. Un tipo de produción enerxética que tamén se instalou en explotacións gandeiras, pequenas e medianas empresas, ou incluso en moitos concellos.
A parlamentar nacionalista considera este Decreto tan lesivo que require de explicacións en sede parlamentar por parte de Soria. Un Ministro que pasará á historia pola súa obsesiva cruzada contra as enerxías renovábeis posto que adicou a lexislatura a perseguilas e a aminoralas, e a facer un traballo especial de servizo e pleitesía ás grandes empresas eléctricas.
Rosana Pérez afirma que nun estado que ten a factura da luz más alta da UE, con dous millóns de persoas na probeza enerxética e que ten unha enorme dependencia enerxética, resulta un despropósito castigar o autoconsumo eléctrico.
Sen esquecer que é unha norma que invade competencias autonómicas.