A deputada do BNG no Congreso, Rosana Pérez, subiu á tribuna do Congreso para criticar as partidas de Fomento destinadas a Galiza e pór de manifesto as deficiencias e os incumprimentos. Comezou a súa intervención expresando as condolencia do BNG á familia do traballador falecido nas obras do AVE en Laza, e demandando á Ministra de Fomento que se intensifique a vixianza nas obras públicas, porque non é a primeira vez que pasa.
Unha vez que a Ministra de Fomento fixo a súa exposición, Rosana Pérez afirmou que o défice de infraestruturas en Galiza é tan vello como as promesas dos distintos Ministros. Nese sentido, criticou a estratexia de Fomento consistente en que os galegos e as galegas vivamos no anuncio permanente, e co discurso de que Galiza é a grande beneficiaria dos esforzos inversores do Ministerio.
Máis, subliñou, a realidade é ben distinta. Así, sinalou que do total de investimentos adicado a Galiza en 2016, un 1,7% menos que en 2015, máis de 833 millóns adícanse integramente a obras da alta velocidade, e case a totalidade desa contía, uns 770 milóns, van destinados ao tramo Lubián-Ourense. Sen esquecer que os dados de 2012, 2013 e 2014 demostran que se deixa sen executar anualmente entre o 30 e o 40% do orzamentado. Razón pola que acusou a Ana Pastor de transformar os orzamentos nun xigantesco artificio contábel.
Alardear de prazos cando hai tramos de AVE parados
Criticou á Ministra por alardear de números mentras varios tramos do acceso do AVE a Galiza continúan paralizados desde hai oitos meses como os de Sanabria-A Gudiña. Como pensan cumprir o prazo de 2018 nestas condicións? Rebaixando as condicións das obras previstas inicialmente? Actuando como fixeron coa recente inauguración do Eixo Atlántico A Coruña-Vigo, que foi posto en marcha sin o ERTMS, a pesar do tráxico accidente de Angrois?. Estas foron as preguntas claras que a deputada do BNG formulou a Ana Pastor no pleno.
No seu turno de defensa das emendas do BNG ao capítulo de Fomento dos Orzamentos 2016, Rosana Pérez explicou a proposta do BNG para seguranza ferroviaria cifradas en 30 millóns de euros. Así como 8 millóns para un plan de supresión de pasos a nivel na Galiza, onde aínda se manteñen máis de cen.
Denunciou as deficiencias nos tramos ferroviarios interiores que seguen acumulando gravísimos défices. Lembrou que o Eixo Atlántico quedouse só en A Coruña-Vigo, excluindo a Ferrol, no que constitúe a crónica dun despropósito anunciado e que supón o illamento de Ferrol. O BNG non renuncia a este tema e propón 10 millóns para incluir a Ferrol no Eixo.
Outras ausencias sinaladas pola deputada do BNG é a que atinxe ás cercanías: desaparece a cantidade que lle adicaron estes anos. O BNG non desiste e pide 25 millóns para instaurar os servizos de proximidades. Outras asignaturas pendentes son as conexións ferroviarias cos portos de Ferrol, A Coruña e principalmente Vigo que nin se menciona.
Estradas: N-550, A-8, N-VI
No que atinxe ás infraestruturas viarias, Rosana Pérez salientou a necesidade urxente de remodelar a N-550, a única alternativa á prohibitiva AP-9. Razón pola que o BNG propón partidas para mellorala. En relación á A-54, Santiago-Lugo, a este ritmo non entrará en funcionamento antes do 2020, con máis de dez anos de retraso.
A A-8 que Rosana Pérez bautizou como desgrazadamente famosa, polos seus continuos peches como os deste verán, é a estrela dos anuncios incumpridos. Criticou que Fomento só destine 200.000 euros, e que non arranxará os problemas desta autovía. Algo que contrastou coa proposta do BNG de adicar 2 millóns a este tema. Asemade, demandou unha partida de 500.000 euros para a mellora da N-634.
Para a N-VI, o BNG demandou 2 millóns para a mellora da súa seguridade vial.
A deputada do BNG aproveitou tamén para facer unha referencia ao dique norte de Alcoa. Cuxa liberalización para usos comerciais concita o acordo de todos os grupos da zona, e nós propomos 500.000 euros para este cometido.
Industria: máis partidas para o sector naval
A deputada do BNG salientou asemade o feixe de emendas destinadas ao eido industrial. Con especial mención ao sector naval público. Rosana Pérez salientou que destinen 54 millóns á segunda anualidade de construción do BAM, que ten un período de execución de 5 anos e que só existe nos papeis. Criticou a ausencia de partidas para a F-110 e o feito de que o PP xa deixou caer o dique flotante. Nese sentido, destacou a partida de 30 millóns proposta polo BNG. 150 millóns para dotar dun Fondo específico ao sector naval, e 30 millóns para un programa de apoio á industria auxiliar.
Rematou apelando á necesidade dunha política de investimentos no eido naval, que vostedes non levaron a cabo. En calquera caso, expresou o desexo de que nas vindeiras elecións de decembro, os cidadáns de Ferrolterra, a falla de traballo, teñan boa memoria.
