En pleno debate sobre o decreto do Goberno central de recortar a duración para obter un título superior, o BNG considera que a mellor maneira de enfrontar a degradación do ensino que supón esta proposta do PP é fixar unha posición común das tres universidades galegas, que se traduza en títulos homoxéneos en duración e en custe dos estudos.
A proposta do BNG é que Galiza debe ter unha posición común das tres universidades que debe ser asumida pola Xunta, que inclúa títulos uniformes sen custe maior dos masters en relación aos graos, e que nas tres universidades o custe dos créditos sexa idéntico para favorecer o acceso do alumnado aos dous niveis, explicou o portavoz nacional, Xavier Vence, tras a reunión celebrada cos tres colectivos que integran a USC.
Na reunión houbo coincidencia en denunciar que a reforma supón un retroceso enorme que favorece ás universidades privadas, e dificulta que os fillos e as fillas das familias máis humildes podan completar os dous ciclos universitarios porque se encarecen.
O BNG tamén abordou co persoal docente e investigador, co persoal administrativo e co estudantado a situación do financiamento universitario, -en plena renovación-, e o sistema de bolsas.
Vence defendeu un debate con luz e taquígrafos no que participe toda a sociedade e todas as forzas políticas, que non sexa levado ás agachadas desde a Consellería de Educación, cuxos anuncios para o futuro plan de financiamento plurianual van na dirección equivocada porque insisten nos recortes, alegou.
Para o Bloque, o futuro sistema de financiamento universitario debe responder a dous requisitos: garantir a calidade dos servizos e das dotacións básicas e que ningún alumn@ capaz de acceder á universidade quede fora por falta de recursos. Isto implica unha dotación económica que non debería baixar dos 450 millóns de euros anuais, - un 5,3% do orzamento autonómico con cifras de 2015-, fronte aos 374 millóns de euros deste exercicio, e garantir o persoal docente e investigador necesario, hoxe en risco pola taxa de reposición.
Aposta estratéxica
A Universidade é parte do futuro do país é ten que ser unha aposta estratéxica, sen escatimar esforzos en manter a calidade e a facilidade de acceso, salientou Vence, para quen un financiamento variable en base a determinados criterios é unha desculpa para xustificar unha redución, alertou.
Igualmente, o Bloque demanda ampliar a dotación de bolsas que está en constante caída nos últimos anos, -só as Erasmus experimentaron un recorte do 37% no último ano a nivel estatal-, e unha xestión desas bolsas con criterios específicos para Galiza que debe levarse a cabo pola propia Xunta. A formación nacionalista levará todas estas propostas en forma de iniciativas parlamentarias tanto á Cámara galega como ao Congreso.