A deputada reclama que se abra unha nova etapa baseada en tres eixos: Recoñecer a realidade de discriminación do galego, un compromiso firme cos dereitos das persoas polo uso da súa lingua e que a Xunta e Partido popular rectifiquen os obstáculos como o decreto do plurilingüismo.
A parlamentaria do BNG, Ana Pontón valorou hoxe, en rolda de prensa, o informe de avaliación de cumprimento da Carta europea das linguas rexionais e europeas minoritarias, informe avalado polo propio Consello de Europa e que dende o BNG, manifestou, resulta unha emenda á totalidade á política lingüística que o Partido popular está aplicar en Galiza.
O Consello europeo constata o impacto negativo do decreto do plurilingüismo
A parlamentaria lembrou que o propio Consello de Europa chama a atención sobre as consecuencias do decreto contra o galego e afirma que o decreto do plurilingüismo do 2010 tivo un impacto moi negativo ao fixar un máximo do 50% de ensino galego co obxectivo final de reducido a un terzo mentres que prohibe o ensino en galego en Matemáticas, na Primaria, e en Matemáticas, Tecnoloxía e Química na Secundaria e con respecto ao ensino na etapa infantil, o galego só está presente en niveis do 6,57% en cidades de máis de 50.000 habitantes.
O BNG reclama elaborar un novo decreto do ensino do galego para acadar a súa normalización
Pontón reclamou abrir unha nova etapa para conseguir a total normalización do idioma galego. Esta nova etapa, explicou, debe partir de tres principios fundamentais: Que a Xunta recoñeza a situación de desigualdade e desequilibrio do galego, garantir o dereito a vivir en galego sen discriminacións polo seu uso e finalmente, vontade política da Xunta de Galiza e o Partido popular para rectificar os atrancos contra o galego.
Para a deputada resulta imprescindible elaborar un novo decreto que regule a presenza no ensino do uso do galego. Por outra parte considerou que o discurso de fondo do informe europeo avala as reivindicacións da plataforma Queremos galego, a Real Academia Galega, o Consello da Cultura Galega e outras institucións que sinalaban que a aprendizaxe doutras linguas no ensino nunca podía ir en detrimento da propia lingua.
Asemade, a parlamentaria denunciou que a Xunta de Galiza non fixo pública avaliación do impacto do decreto a pesar de estar recollida no informe de competencia lingüística e agora constamos,dixo, como expertos europeos e o propio Consello de Europa sinalan que un dos problemas observados é precisamente a ausencia desa avaliación.
Dende o BNG, engadiu, consideramos que o Partido popular non quere facer pública a avaliación porque sabe que o impacto do decreto do plurilingüismo vai en contra do galego e do seu coñecemento.
O informe europeo, abondou Pontón, tamén resalta as dificultades do emprego do galego na Xustiza, o retroceso nos servizos públicos na atención en lingua galega e a necesidade de impulsar acordos para que o galego gañe maior espazo nos medios de comunicación así como no ámbito bancario e no sistema sanitario.
Finalmente, a parlamentaria concluíu criticando a mentira na que vive instalado o Partido popular mirando para outro lado ante os problemas do galego na propia administración e o incumprimento da legalidade, á hora de protexer os dereitos das persoas a usar a propia lingua.