Ante as novas necesidades de capitalización de Novagaliciabanco -precisaría 4.500ME máis para se sanear, segundo anunciou o subgobernador do Banco de España hoxe no Congreso- o portavoz nacional do BNG, Guillerme Vázquez, afirma que a única alternativa é avanzarmos cara a unha Banca Pública Galega.
Ou imos a unha banca pública galega ou Novagaliciabanco desaparecerá como tal, ou ben absorbida por Bankia ou ben comprada a prezo de saldo polo gran capital internacional, reflexiona o portavoz nacional.
A estratexia do PP de nacionalizar para privatizar acabará con Novagaliciabanco en mans foráneas
O líder nacionalista non partilla en absoluto a estratexia do Goberno español de nacionalizar para privatizar, porque iso significa que o pobo pague as facturas para que logo os beneficios vaian a petos privados. Nacionalizar para privatizar é unha estratexia que terá como resultado que Novagaliciabanco acabe en mans foráneas, engade.
Guillerme remarca que neste momento é máis urxente que nunca que se constitúa unha Comisión de Investigación no Parlamento galego para depurarmos as responsabilidades pertinentes pola desastrosa xestión técnica e tamén política que ten conducido ao desaparecimento do sistema financeiro galego.
O portavoz nacional considera que a responsabilidade política no desastre de Novagaliciabanco atinxe clarisimamente a Feijóo por non ter sabido liderar a defensa do aforro galego e por ter colaborado no deseño que conducirá a Novagaliciabanco á súa desaparición como entidade galega con centro de decisión en Galiza.