O candidato do BNG ao Congreso por A Coruña, Néstor Rego, a eurodeputada, Ana Miranda e o historiador Carlos Babío, autor da obra “Meirás, un pazo, un caudillo, un espolio” denunciaron hoxe no Parlamento europeo a situación do colectivo 19 de Meirás denunciados pola Fundación e familia Franco, tras participar nun acto pacífico e reivindicativo pola devolución dos Pazo de Meirás.
O Grupo europeo de Memoria histórica trasladou aos membros do BNG a súa intención de continuar traballando, na vindeira lexislatura, por unha devolución real do Pazo. Para o candidato do BNG ao Congreso e membro do colectivo 19 de Meirás, Néstor Rego estamos ante “unha anomalía democrática” ao comprobar como unha familia desfruta dunha propiedade “roubada polo ditador” amparado polo seu poder durante os anos da guerra” e avalada pola propia monarquía.
Rego explicou que a recuperación do pazo de Meirás non se basea exclusivamente no seu valor económico, “ten un gran valor político e simbólico” de restauración da dignidade e da memoria democrática, dixo. Ademais criticou “a inacción” do goberno español, que a pesar de contar coa base xurídica elaborada polo Parlamento galego e Deputación da Coruña para proceder a súa reclamación, “non tomou ningunha medida”. Neste sentido, indicou que a única explicación para que non se proceda á reclamación é “a existencia de presións por parte dos poderes fácticos, incluída a Casa Real”.
O grupo de Memoria Histórica do Parlamento Europeo, do que forma parte a eurodeputada do BNG, Ana Miranda, comprometeuse a seguir traballando pola devolución do pazo de Meirás. Ademais, o grupo defensor da recuperación da memoria, e no seu nome as eurodeputadas Soraya Post e Eleonora Forenza -impulsoras xunto Ana Miranda da Resolución contra o Avance do Fascismo en Europa- expresaron o seu apoio ao colectivo 19 de Meirás e ao historiador Carlos Babío, denunciados pola Fundación e familia Franco.
“A recuperación do pazo de Meirás é unha reclamación que seguirá viva na próxima lexislatura,” indicou Ana Miranda que, a maiores, propuxo elaborar un estudo sobre “o impacto económico do espolio franquista”.
Miranda reiterou que o colectivo 19 de Meirás está acusado pola Fundación e familia Franco por “Violación de morada”, tras un “acto simbólico e pacifico” para reclamar a devolución do Pazo de Meirás e que segundo o Código Penal español está penado con prisión.
Desde o grupo de Memoria Histórica da Eurocámara, dixo Miranda queremos acadar visibilidade internacional sobre a impunidade do franquismo e rematar co incumprimento de principios europeos sobre a memoria democrática.
Pola súa parte, Néstor Rego engadiu que o BNG continuará presentando iniciativas destinadas ao cumprimento da Lei de Memoria histórica e a devolución dos bens incautados pola ditadura en Galiza.
