O candidato do BNG á presidencia da Xunta, Francisco Jorquera, demandou hoxe que os ex-directivos das caixas galegas por ética, devolvan as indemnizacións millonarias que percibiron.
Jorquera lembrou que aínda fican 33 millóns de euros en concepto de dereitos de xubilación pendentes de cobro, o que considerou atenta contra a ética, contra os principios elementais da moralidade.
Neste sentido, considerou necesario que restitúan o percibido e que non haxa estes beneficios. Ademais, volveu defender que se abra unha investigación no Congreso dos Deputados e no Parlamento Galego para depurar responsabilidades pola desfeita do sector financeiro.
A Banca Pública Galega é a única alternativa para Novagalicia Banco
Por outra parte, afirmou que a única alternativa que garante que Galiza teña entidades de aforro propias, que o aforro galego non se espolie e que se invista na economía produtiva é transformar Novagalicia Banco nunha Banca Pública Galega.
Jorquera subliñou que é posíbel se existe vontade política, porque o capital público do Estado xa ten máis do 90% do accionariado e co rescate bancario via ser aínda maior.
Defendeu que o que non pode ser é o que quere facer o PP: socializar as perdas das malas prácticas financeiras no conxunto da sociedade a través de recortes, para que logo os beneficios sexan privados e esas entidades sexan entregadas a entidades privadas.