O BNG acadou o apoio unánime da Cámara para divulgar o labor das Irmandades da Fala no centenario da súa fundación por Ramón Vilar Ponte, Micaela Chao, Manuel Lugrís, Uxío Carré, Luís Porteiro e Florencio Vilar que recolleron o legado de Murguía, Pondal e Rosalía.
A deputada do BNG, Ana Pontón salientou o grande tributo das Irmandades da Fala nos ámbitos político e lingüístico polo que pediu respectar a historia e divulgar o traballo realizado por esta organización de intelectuais galegos.
Pontón explicou que resulta evidente que o programa das Irmandades da Fala e moitos dos seus puntos non serían subscritos polo Partido popular involucrado nun proceso de recentralización e marxinación da lingua galega pero hoxe o importante, dixo, é vernos reflectidos no traballo das Irmandades da Fala e no seu programa de autonomía integral para Galiza, do ingreso de Galiza na Liga das Nacións, buscar as bases dun posible federalismo con Portugal, que Galiza conte cun Parlamento lexislativo pleno e elixido polo pobo e que se supriman as deputacións provinciais.
Feitos da nosa historia fundamentais para entender o presente
Seguramente, dixo, a pesar da vixencia das reclamacións das Irmandades da Fala, moitos deputados e deputados/as non estarían dispostos a asumilas pero hoxe o relevante é o recoñecemento deste Parlamento do labor que esas persoas, homes e mulleres de Galiza e do que fixeron nese momento por iso, seguimos dicindo que o mellor tributo é converter a súas ideas en realidade como está a facer o Bloque nacionalista galego.
Antón Losada Diéguez, Vicente Risco, Otero Pedrayo, Cuevillas, Castelao, Anxel Casal... rexeitaron a rexía colonización castelán e a propia autoinferioridade que aínda hoxe custa caro desbotar a algúns, como reflicte un dos textos, explicou, que deixaba xa entrever as preocupacións dos intelectuais que impulsaron as Irmandades da Fala e que rapidamente se estendeu por todo o país e que foi reprimida pola ditadura de Primo de Rivera.
A parlamentaria congratulouse da unanimidade no hemiciclo e amosou o seu desexo de que a Xunta estableza un programa de actividades para divulgar o coñecemento do importantísimo labor desta organización para acadar unha Galiza máis libre, culta, xusta e comprometida consigo mesma para o que pediu dotar de fondos necesarios aos organismos responsábeis do programa de divulgación.
O PP recoñece o importante labor das Irmandades.
Pola súa parte o portavoz do PP, Agustín Baamonde lembrou as palabras de Fernández del Riego cando afirmaba que moitos dos membros das Irmandades consideraban a fala como un instrumento de loita necesario para acadar unha identidade propia, cultural e unha cultura autóctona e destacou a lealdade e nobreza das Irmandades da Fala polo que é merecedora, dixo, de respecto e recoñecemento, sen embargo, o popular non se resistiu a criticar ao BNG do que dixo mantén moitas veces posicións partidistas e convidouno a seguir o espírito plural das Irmandades.
Aí están algunhas das reivindicacións xa incorporadas como o Estatuto de Galiza e competencias en educación polo que reiterou o seu convite á oposición a unir forzas na defensa do idioma galego e anunciou o seu voto afirmativo á proposta nacionalista.