- Montse Prado pide explicacións ao Goberno polo acoso laboral contra unha traballadora da empresa de transporte de viaxeiros “HEDEGASA” dende o ano 2009
- A nacionalista preguntou que actuacións políticas vai iniciar a Consellería de Traballo ante unha empresa que conta cunha concesión pública e que está inmersa nun gran número de denuncias e condenas por vulnerar os dereitos dos traballadores e traballadoras
A deputada do BNG, Montse Prado interpelou hoxe ao Goberno sobre a discriminación e acoso laboral contra unha traballadora inflixido pola empresa de transporte de viaxeiros HEDEGASA dende o ano 2009.
A parlamentaria asegurou que a traballadora está nunha situación de discriminación “por razón de xénero” polo que preguntou se o Goberno coñece esta situación e o extenso historial de condenas por acoso laboral e danos morais ocasionados pola empresa HEGASA.
Trala resposta do conselleiro de Economía e Industria, Francisco Conde que anunciou para o vindeiro 9 de febreiro o acto de conciliación, a deputada recalcou que HEGASA vulnera sistematicamente a lexislación laboral e con sentencias xudiciais que confirman o acoso contra esta traballadora polo que volveu preguntar que vai facer a consellería, “vai renovar novamente a concesión ou vai utilizar os medios políticos para resolver unha situación laboral indecente”, preguntou.
Nélida Pisco, explicou a deputada, “sempre defendeu o seu dereito a ser nai e manter o seu posto de traballo” e lembrou que dende o ano 2009, a traballadora como condutora de autobús da empresa HEDEGASA , concesionaria de transporte regular de viaxeiros, ven sufrindo unha situación de acoso laboral despois dun embarazo de alto risco e nacemento da súa filla cunha enfermidade conxénita que precisa lactancia natural polo que a traballadora solicitou da empresa as súas vacacións anuais, licenza por maternidade e redución de xornada para poder atendela ao que a empresa, “vulnerando a legalidade vixente” negou a solicitude e respondeu que o que debe facer “é ir para casa a coidar a filla e xa se verá se será contratada novamente”.
Nélida non aceptou a decisión da empresa en entrou “nun auténtico calvario de despidos, e sentenzas que obrigan a empresa a reincorporala pero que fan en condicións e rutas que lle impiden manter contacto cos seus compañeiros, non lle entregan as nóminas nin o uniforme preceptivo. Montse Prado cualificou a situación de Nélida Pisco de “psicoterrorismo” por parte da empresa HEDEGASA e recriminou que o conselleiro de Industria non anunciara ningunha medida contra a actuación “aberrante” de HEDEGASA contra esta traballadora.
A parlamentaria concluíu a súa intervención preguntando se a Xunta vai deixar soa a Nélida Pisco na súa loita pola igualdade e dereitos das mulleres e pagando a peaxe individualmente por reclamar o que lle corresponde.
