O voceiro de Economía do GP do BNG, Carlos Aymerich, defendeu este Mércores en pleno a necesidade dun banco público galego, construido sobre Nova Galicia Banco unha vez transferido o capital do Frob, para poder contar cunha entidade que teña outra forma de facer.
Precisamos dunha banca pública engadiu-, solvente e comprometida con Galiza, coa súa obra social e co seu investimento, que dea crédito en vez de impoñer comisións abusivas aos seus clientes e non caia en produtos como o das preferentes, que ten entrampados a máis de 43.000 pequenos aforradores.
Comisión de Investigación
Aymerich, que interpelou á conselleira de Facenda sobre o mantemento do sistema financieiro galego, reiterou que o único anuncio que agarda o BNG e os cidadáns por parte do goberno do PP sobre este tema é que anuncie que deixan de obstaculizar a comisión de investigación sobre a xestión das caixas e comecen a comparecer os seus ex directivos.
De onde ven o burato de máis de 4.500 millóns de euros? preguntou- temos dereito a saber que fixeron cos nosos aforros.
O deputado nacionalista lembrou que cando se descubriu o burato de Bankia, Feijóo pediu igualdade de trato para Nova Galicia Banco; o presidente non contou, explicou o parlamentar, que a Bankia se lle fixo un traxe a medida, á marxe da normativa vixente, pois nós tamén queremos un traxe a medida pero dos intereses deste País, non dos de Castellano.
Temos dereito a saber de onde vén o burato de 4.500 millóns de euros de NGB
Sistema financieiro fracasado
Neste sentido, insistiu na necesidade dun banco público como única alternativa a un sistema financieiro que fica demostrado que fracasou e boa proba deste fracaso, dixo, son os cinco decretos leis de saneamento e reestructuración que se levan aprobado dende 2009 sempre co acordo mutuo de PP e PSOE.
Para Aymerich, o problema é que non se pretendía sanear senón aproveitar a crise para impor un modelo pactado entre populares e socialistas baseado nun sistema financieiro centralizado e concentrado, e malia o exemplo de Bankia non damos aprendido e seguimos teimando en privatizar as caixas e en favorecer máis fusións.
