Baixo o lema Que non che coman o coco, temos un país de primeira, oBNG lanza unha campaña para reivindicar unha Galiza en positivo fronte á imaxe interesada da Galiza subsidiada e dependente de papa Estado que difunde o PP e todos os que compran o discurso centralista de Madrid.
Que non nos conten milongas e sintamos o orgullo de ter un país de primeira, proclamou a secretaria de Imaxe e Campaña, Montse Prado, quen reivindicou a marca Galiza fronte a marca España, na presentación da campaña que se difundirá masivamente por todo o país con folletos informativos e actos abertos á cidadanía, coincidindo co 36 aniversario da Constitución española, que actúa como mordaza imposibilitando o dereito a decidir e a soberanía de Galiza, denunciou.
Apelar á autoestima de ser galegos e galegas cun país capaz de gobernar o seu futuro e desmontar o falso discurso dunha Galiza subvencionada, pobre, que non pode valerse sen a muleta do Estado. A campaña do BNG desmente con datos concretos a recorrente falacia da solidariedade estatal.
Galiza recibe menos do que aporta ao Estado vía impostos, como demostra a última balanza fiscal que mostra unha recadación de 7.213 millóns de euros fronte a un investimento de 5.891millóns de euros. Igualmente, o país recibe tres veces menos fondos europeos que Madrid, pese a que son para a cohesión territorial e a renda e as pensións galegas están á cola do Estado.
En materia enerxética Madrid é un burato negro que absorbe a produción de electricidade, sen que as industrias ubicadas en Galiza se beneficien dunha tarifa eléctrica propia dun país produtor e exportador de enerxía. Mentres, as autoestradas galegas, dependentes do Goberno central, encabezan a lista das máis caras, e viaxar de Ferrol a Tui case duplica o custe de viaxar a Madrid.
O espolio dos recursos tamén inclúe ao aforro galego coa peor evolución da relación créditos concedidos a familias e empresas con respecto aos depósitos nas entidades financeiras. E o abandono do goberno central cando se trata de defender os intereses dos principais sectores produtivos, -agro, pesca e naval-.
Pensemos en positivo, que non nos coman o coco con esa idea de que somos un país sen capacidade e sen potencialidade, como un país que precisa de papa estado para saír adiante como nos queren vender os que compran o discurso centralista e madrileño, explicou o portavoz nacional, Xavier Vence.
Pola contra, Vence salientou que Galiza sairía adiante se tivera liberdade para organizar doutro xeito a súa economía, para xestionar os nosos propios recursos financeiros, os nosos impostos e para ter unha política autocentrada pensada desde aquí por un goberno que teña os pés e a cabeza en Galiza e que non estea sometido aos ditados do Goberno central ou de Bruxelas.
O dirixente nacionalista puxo como último exemplo as xestións feitas polo BNG na Eurocámara en defensa do xeito, organizando unha delegación do sector a Bruxelas, abrindo a porta a que esta arte de pesca quede excluída dunha normativa que finiquitaba o futuro de 427 embarcacións. As solucións non virán de Madrid, témolas que buscar nós, concluíu.
Descarga o folleto da campaña.