Os pobos temos a palabra é o título do manifesto ao que se adhiren máis de dez forzas políticas que participan dunha campaña expansiva con actos en distintos puntos o vindeiro 6 de decembro.
Ademais do BNG, outras formacións como ERC, CUP, EH Bildu, Mes x Mallorca, IzCa, Unidad del Pueblo, Puyalon de Cuchas e Andecha súmanse ao manifesto Os pobos temos a palabra, un documento que se difunde nestes días previos ao 6 de decembro en que se desenvolverán en distintos puntos actos e mobilizacións promovidas por cada unha das forzas políticas que se adhiren á iniciativa. A campaña ten como obxectivo mostrar a vontade de construír espazos de colaboración e contribuír á apertura de procesos constituíntes cara unha ruptura democrática co réxime de 1978 que, segundo sinalan, só pode vir da man do dereito dos pobos a decidir.
A necesidade de sumar forzas desde os nacionalismos fronte aos ataques do centralismo é unha das mensaxes centrais da campaña que chama á sociedade á defensa da soberanía e o dereito das nacións a construír libremente o seu futuro. Consideran as forzas políticas asinantes que o marco xurídico-político saído da Constitución de 1978 está esgotado e apostan por unha ruptura democrática que responda, agora si, á vontade dos pobos e á urxencia de transformación social de cara un futuro máis xusto e igualitario.
O manifesto nega a posibilidade dun pacto cun Estado que non é quen de asumir o dereito das nacións e os pobos a se organizaren libremente e, na outra cara, proclama que corresponde aos pobos e á cidadanía determinar, de forma democrática, o seu futuro. A través das redes e nas plataformas de cada unha das formacións difundirase nestes días o contido do manifesto conxunto da man tamén de representantes das distintas forzas políticas nunha campaña expansiva que se desenvolverá nas distintas linguas co identificador #ospobostemosapalabra.
O 20D a mudanza só pode vir desde os nacionalismos
Alertan no documento Os pobos temos a palabra da ofensiva recentralizadora do Estado e a defensa ardente da unidade de España, a que se prestan partidos de vello e novo cuño que negan os dereitos de pobos e nacións. Neste contexto, que se acentúa na resposta ao proceso soberanista catalán, as forzas asinantes do manifesto consideran que é totalmente ilusorio esperara a que unha eventual alternancia electoral, o próximo 20 de decembro, entre partidos que se negan a aceptar o dereito a decidir dos pobos, habilite unha auténtica mudanza política. As forzas nacionalistas asinantes defenden, nese sentido, que sen a presenza de procesos emancipatorios dos pobos non é posíbel a ruptura democrática para o que manifestan a vontade de contribuír a unha estratexia conxunta de colaboración entre as forzas políticas soberanistas.
As formacións políticas que se adhiren ao manifesto comprométense a traballar conxuntamente na loita contra o centralismo e na apertura de novos procesos constituíntes e a impulsar procesos constituíntes populares, sociais e democráticos nas distintas nacións. Apostan pola colaboración no obxectivo de se dotaren de instrumentos e mecanismos para ser a cidadanía quen decida o seu futuro e para facer fronte conxunto aos ataques ao exercicio dese dereito fundamental.