O BNG súmase á convocatoria cidadán plasmada no Manifesto pola unidade que convida ás forzas políticas e ao conxunto da cidadanía á celebración unitaria do Día da Patria. Neste sentido, a manifestación do 25 de Xullo estará encabezada, seguindo a proposta desta plataforma cívica, por unha pancarta que portarán representantes do colectivo convocante da mobilización unitaria.
Imos estar detrás desa pancarta que vai encabezada por persoas que non representan a partidos políticos concretos senón ao conxunto do país que, baixo o lema A nación galega, expresará iso: que moita nación galega vai estar detrás desa pancarta reivindicando os nosos dereitos nacionais como pobo, avanzou o portavoz nacional, Xavier Vence, confirmando o apoio do Bloque a esa convocatoria.
Queremos partillar ese 25 de Xullo unitario, compartir c@s nacionalistas, -organizados en forzas políticas e non organizados-, que pensen que Galiza merece un apoio de todos e de todas para facer oír a súa voz, que queren ver recoñecidos os seus dereitos nacionais, que aspiran a que Galiza poda gobernarse de forma plena, ter soberanía para decidir sobre as cuestións que afectan á vida da xente deste país, explicou Vence.
Manter o status de Galiza como nación en pé de igualdade co resto das nacións do mundo, respecto e normalización plena da lingua e cultura propias, dotarnos das ferramentas que permitan darnos un futuro esperanzador son, dixo Vence, desexos compartidos por moitos galegos e galegas e organizacións políticas. Con todos, o BNG quere compartir ese día singular para reivindicar os nosos dereitos nacionais.
Ao mesmo tempo, o Bloque continúa coa súa campaña de actos de celebración do Día da Patria por todo o país, -preto dun cento por concellos e comarcas-, co obxectivo de quentar motores e conseguir encher as rúas de Santiago nun día de festa reivindicativa dos nosos dereitos como nación. Esta campaña desenvólvese baixo o lema Adiante Galiza, soberanía e democracia, porque a loita polos dereitos de Galiza como pobo, e tamén a loita por unha democracia de calidade.
A formación nacionalista participará na habitual ofrenda floral de Galiza Nova no panteón de galegos ilustres a Castelao e Rosalía, e en todos aqueles actos de sensibilización para conseguir que o 25 de Xullo sexa unha festa reivindicativa de todos e todas e unha mobilización masiva que encha as rúas de Santiago.