Francisco Jorquera instou á Xunta de Galiza a demandar do Goberno Español unha comisión de expertos para identificar a débeda ilexítima contraída contra os dereitos da cidadanía
O portavoz do grupo parlamentaria do BNG, Francisco Jorquera propuxo hoxe, na Comisión de Economía do Parlamento galego, crear unha comisión de expertos para investigar a débeda pública ilexítima do Goberno español.
A través desta iniciativa, dixo, volvemos a debater sobre a débeda pública e en particular sobre a débeda odiosa ou ilexítima contraída contra os intereses dos cidadáns.
O deputado explicou que segundo as últimas información publicadas, a Débeda Pública do Estado marca un novo record no mes de febreiro que alcanza o 1,04 Billóns de euros, o Estado só recuperou o 4,3% das axudas á banca e a Banca española eleva os seus beneficios nun 35 %.
Rajoy incrementou a débeda pública en 296.469 millóns de euros en menos de tres anos
Os datos evidencian que en pouco menos de 3 anos, o Goberno español incrementou en 29 puntos a débeda pública situándoa no 98,2 do PIB. Se comparamos estas cifra coa débeda de fins de 2011, o primeiro exercicio con Mariano Rajoy aumentou a débeda do 69,20% ao actual o 98,2%. en 296.469 millóns de euros.
A maiores, engadiu Jorquera, dos 61.495 millóns destinados á Banca en forma de axudas directas, 53.535 deles aportados polo FROB, dos que só foron recuperados 15.841 millóns. Por outra banda están outras axudas en avais á Banca por valor de 110.895 millóns dos que o FROB recuperou 105.641, perdéndose 5.245 millóns.
O FROB tamén recoñece a perda de 9.581 en concepto de esquemas de protección e activos e concedeu axudas para promover a SAREB de liquidez mediante liñas de créditos por un montante de 2.192 millóns.
Entre axudas directas e indirectas, afirmou o parlamentario, o Estado destinou 280.000 millóns de euros á Banca para saneala, en contra do discurso do PP que non se pode gastar o que non se ten.
O deputado criticou que os bancos foran rescatados con diñeiro público cando no ano 2014 á banca obtivo máis 35% de beneficios respecto do ano 2013. A Banca, reiterou, recuperou o nivel de recuperación de beneficios e de lucro anterior á crise mentres os cidadáns seguimos padecendo recortes brutais e con grandes dificultades para chegar a fin de mes. En cousas como estas, dixo, consiste a débeda odiosa, a débeda ilexítima
O BNG non propón deixar de pagar a débeda
Jorquera reiterou que o BNG non fala de impago e recalcou que iniciativa do BNG, pide unha auditoría para que a xente saiba o diñeiro que foi destinado para sanear á Banca.
Suscitamos este debate no Parlamento porque temos dereito a saber eses datos polo que anunciou que o BNG seguirá presentando iniciativas neste sentido. Consideramos que a cantidade astronómica de 1,04 Billóns de euros merece ser analizada ate as últimas consecuencias, explorando as orixes da débeda e estudando as solución a este problema.
O portavoz do PP, Pedro Puy e do PSOE, Méndez Romeu anunciaron o seu voto en contra á iniciativa nacionalista que contou co apoio do Grupo Mixto.