A deputada afirmou que non lle merece credibilidade unha Fiscalía que durante vinte anos non se pronunciou sobre os enchufes do pai, ata que o PP quixo desfacerse del.
A deputada do BNG, Tereixa Paz pediu hoxe ao Presidente da Xunta non escudarse na decisión da Fiscalía de arquivar a denuncia contra o Presidente da Deputación de Ourense acusado de ofrecer un posto de traballo a unha muller a cambio de relacións sexuais.
A parlamentaria manifestou que durante vinte anos, o BNG denunciou ante a Fiscalía ao anterior titular da Deputación de Ourense, José Luís Baltar por utilizar a institución para enchufar e a Fiscalía ata que non lle conveu ao Partido popular cargarse ao Sr. Baltar, non dixo nada. Polo tanto, afirmou a nacionalista, a Fiscalía instrumentalizada polo Partido popular e a deste fiscal en concreto relacionado co Hipódromo de Vilamarín da Deputación Provincial de Ourense, non me merece ningunha credibilidade .
Dende o principio, explicou, manifestei que non estou aquí para facer un xuízo penal porque a miña obriga é facer un xuízo político e sigo manténdoo, o Sr. José Manuel Baltar é un corrupto que non merece estar ao fronte dunha institución. A parlamentaria asegurou que dende o punto de vista ético, a actitude de Baltar contra a muller denunciante inhabilítao para permanecer un só segundo na vida pública.
A parlamentaria defendeu unha Proposición non de lei na que reclamaba abrir unha investigación por incumprir a Lei galega de violencia de xénero e exixir o cese inmediato de José Manuel Baltar, iniciativa que foi rexeitada polo grupo maioritario do Partido popular.
Tras a intervención da portavoz popular, Paula Prado que tentou xustificar o respecto desta forza forza política polo proceso penal, a nacionalista reiterou que ofrecer un posto de traballo a cambio de sexo ademais dun claro caso de corrupción pola utilización de recursos públicos en interese particular, constitúe un atentado contra a liberade sexual da vítima.
Finamente, Tereixa Paz reiterou que os feitos non foron negados polo Sr. Baltar o que motivou a dimisión en bloque da Comisión Ética da Deputación de Ourense, aquí xa dimitiu todo o mundo, só falta que dimita o acosador, concluíu.