A deputada e portavoz de Sanidade do BNG, Montse Prado pide explicacións ao Partido popular ante o anuncio do 061 sobre o traslado da ambulancia medicalizada con base no Hospital do Salnés a Sanxenxo.
Para a nacionalista, “a Consellería de Sanidade debe explicar os criterios desta medida” que sen lugar a dúbidas, leva como consecuencia “o aumento do tempo para atender unha urxencia”. As isócronas dende Sanxenxo a Vilagarcía son de 30 minutos, explicou a deputada o que fai urxente contar cunha ambulancia no Salnés tendo en conta o gran número de servizos realizados dende a súa posta en funcionamento no mes de outubro do 2019.
Por outra banda, Prado critica que o Partido popular anuncie esta medida, “xusto no remate das eleccións ao Parlamento galego”.
Dende o BNG, dixo, queremos mostrar o noso rexeitamento a esta medida e no suposto dun aumento de demandas en Sanxenxo exiximos “aumentar os efectivos e unha ambulancia para a zona” pero en ningún caso, “deixando desprotexidos aos veciños e veciñas do Salnés”.
Prado insistiu en que o Partido popular debe “rectificar” a súa decisión e agarda que o anuncio se produza canto antes para non poñer en risco a saúde dos veciños e veciñas do Salnés.
