As deputadas do BNG no Congreso, Rosana Pérez e Olaia Fernández Davila, presentaron unha iniciativa parlamentar na Cámara para exixir ao Ministerio de Facenda que o Programa PADRE para a campaña da Declaración da Renda 2014 contemple a opción de poder utilizar a lingua galega.
Como é posíbel que se obvie o dereito lingüístico dos galegos e das galegas a poder tramitar mediante o Programa PADRE as súas declaracións na lingua propia? A que se debe esta exclusión cando o galego é a lingua oficial de Galiza? A que se debe a constante negativa da Administración Xeral do Estado á hora de asumir o pluralismo lingüístico existente no estado?, son algunhas das preguntas que as deputadas do BNG dirixen ao
Ministerio presidido por Montoro.
As parlamentares nacionalistas enfatizan que un ano máis comezou a campaña da Declaración da Renda 2014, e de novo a Axencia Tributaria fai caso omiso do dereito dos cidadáns galegos a poder realizar as súas declaracións en lingua galega. O Programa PADRE disposto por Facenda na súa web non inclúe a opción do galego.
Un dereito dos cidadáns galegos
Rosana Pérez e Davila explican que este tema leva sendo o cabalo de batalla do BNG desde hai unha década ou máis. É difícil entender tal obstinación, semellante terquedade á hora de asumir e respectar a lexislación lingüística estabelecida. Tanta negativa non pode obedecer unicamente a despistes ou esquecementos ou fallos técnicos. Chove sobre mollado. E debemos concluri que se trata dunha cuestión ideolóxica derivada dun pensamento centralista. Realmente o Goberno do PP só considera de facto lingua oficial o casetelán, de aí que ignore o resto de linguas cooficiais, sobre todo si se trata do galego.
Conclúen as deputadas do BNG que poderíamos concluir que existe unha atración fatal entre o Goberno e a lingua de Galiza.
Esa enquina queda ilustrada asemade noutras constantes vulneracións da Administración Xeral do Estado da toponimia oficial de Galiza. Da igual o Ministerio do que se trate, organismo ou sociedade estatal, ningún respecta as formas toponímicas oficiais galegas. A normalización da lingua galega é un proceso de loita constante a base de reclamacións, preguntas parlamentares e denuncias.
Outra cuestión que denuncian as deputada nacionalistas é a negativa da Administración Xeral do Estado a atender en galego aos cidadáns que así o desexan a pesar de estaren obrigados por lei. O Goberno chegou ao paroxismo de negar a tramitación dunhas sancións en lingua galega a pesar da claridade do estipulado nas normativas vixentes.
As deputadas do BNG sinalan que a estas alturas cremos que existe unha actitude belixerante para coa lingua galega por parte do Estado. Demanda a Montoro que canto antes realice o cambio no Programa PADRE.
