O BNG levou, novamente ao Parlamento galego a conflitividade laboral na CRTVG ante os continuos ataques da dirección aos traballadores e traballadores e a utilización e manipulación do medio público para favorecer os intereses do Partido popular.
A deputada, Alexandra Fernández acusou á dirección do entre público de “persecución, represalias e manipulación informativa”, e pediu responsabilidades ao director xeral, Alfonso Sánchez Izquierdo dun proceder que xa motivou diversas sentenzas xudiciais a favor dos traballadores e traballadoras.
A nacionalista asegurou que a dirección da CRTVG “exerce a represión contra os traballadores que non aceptan a manipulación informativa” e a “manipulación do Partido popular”. Coincidindo co debate na comisión de control da CRTVG, un nutrido grupo de traballadoras e traballadores concentrábanse nas inmediacións do Parlamento galego baixo a consigna “non máis abusos na CRTVG”.
A parlamentaria do BNG explicou que ante o conflito laboral, o director xeral respondeu “botando gas e cunha nova escalada incendiando cada vez máis a situación”. Pasou, dixo, ao emprego da “ameaza e coacción” para seguir co control da corporación.
A deputada insistiu en que a dirección exerce represión contra os traballadores e traballadoras que non aceptan “a manipulación informativa”. O problema, recalcou “é a manipulación que exerce o Partido popular”.
Para a nacionalista, a dirección non quere unha solución ao conflito, a pesar das sentenzas xudiciais do Tribunal Superior de Xustiza de Galiza que afirma que a corporación “reprime e vulnera os dereitos fundamentais dos traballadores” ao que sumou as denuncias do Colexio de Xornalistas e xornadas de folga “nunca vistas nesta casa”.
Por outra parte, criticou que Sánchez Izquierdo “non renda contas” das sentenzas e preguntou cando asumirá responsabilidades porque o argumento de que todo o problema radica no inicio da dixitalización da radio televisión de Galiza “non se sostén”. Este conflito vai máis alá por moito que vostede queira negalo, recalcou.
Na súa intervención, Fernández afeou que o director da CRTVG aluda ás cotas de pantalla como xustificación porque, ao seu xuízo, as cotas de pantalla “non eximen ao ente público de aprobar o Estatuto profesional, crear o Consello de Informativos, ou cumprir coa lei de medios”.
Ademais, engadiu, a propia lei de medios di que o actual director da CRTVG non pode seguir ocupando o seu cargo e polo tanto debe dimitir ou continuar como “ verdugo dos traballadores e traballadoras e de escudo humano da corrupción do Partido popular”. Vostede pode dimitir e hoxe sorprendeunos afirmando que é responsabilidade deste parlamento que se produza un cambio de dirección. Das súas palabras, explicou a deputada, deducimos que está poñendo nas mans do PP que lle busquen unha saída porque xa non aguanta máis esta situación e pediu a Sánchez Izquierdo que confirmara se ben as súas palabras respondían a unha chamada ao Partido popular ou se realmente está disposto ao relevo e que se cumpra a lei de medios
Pola súa parte Sánchez Izquierdo volveu a xustificar que os probelmas da CRTVG non son de xestión porque obedecen a outros intereses alleos ao entre público e que tampouco está disposto a dimitir mentres non se presente un “recambio pechado” no Parlamento galego.
