Carme Adán acusou a consellería de desoír as sentenzas do Tribunal Superior de Xustiza e practicar a crueldade cos traballadores/as dos centros de Benestar
A parlamentaria do BNG, Carme Adán formulou hoxe unha pregunta na Comisión de Sanidade relativa ás condicións laborais do persoal que prestan servizos sociais dependentes da Consellería de Traballo e Benestar e reclamou un compromiso da consellería para mellorar as devanditas condicións.
Na súa intervención a deputada explicou que durante meses o persoal laboral da Consellaría de Traballo e Benestar ven denunciando a situación de sobrecarga de traballo nos centros de Benestar que mesmo chega á crueldade cando se lle denegan as vacacións ao persoal que esta facendo substitucións de baixas de longa duración, c fan contratos en precario de media xornada, fins de semana ou por horas ou cando o persoal en quenda ten que asumir o traballo de outro persoal que non se cubre de vacacións , de baixa ou de permiso xustificado.
A Consellaría desoíu, dixo, as propias sentenzas do Tribunal Superior de Galiza e impuxo unha quenda de traballo que levaron a este persoal a realizar múltiples accións reivindicativas.
Por outra parte, a deputada tamén denunciou o deterioro do servizo que sofren as persoas usuarias e os recortes en materia de conciliación desta Consellaría ao seu persoal.
Pola súa parte, a Secretaria xeral técnica da Consellaría comprometeuse a unha modificación das quendas ao ter aprobado o goberno a creación de 155 postos de traballo para o persoal dos centros de Benestar. Adán lembrou que nestes anos reducíronse en 1500 prazas nos centros de benestar e cubrir un 10% agora non soluciona o problema, concluíu.
