A deputada do BNG Rosana Pérez solicitou a comparecencia do ministro de Sanidade, Alfonso Alonso, para reclamarlle que amplíe o universo de beneficiari@s do fármaco Sofosbuvir. Tras ter presentado iniciativas no Congreso desde fai seis meses neste mesmo sentido, a parlamentaria nacionalista apoia a reivindicación que comparten moitos expertos sanitarios e os doentes, como veñen reiteradamente manifestando.
Pérez critica a estreiteza economicista do Ministerio xa que, ademais do dereito dos afectados e afectadas a ter a mellor asistencia posible, a canto maior número de doentes cheguen os fármacos maiores males se evitarán no futuro. Trátase de facer política preventiva porque, como manifestan os hepatólogos, un transplante ou un tratamento a 39 anos e moito máis custoso que cortar a doenza a tempo con estes medicamentos de nova xeración, argumentou.
Rosana Pérez sinala que os profesionais sanitarios advirten que existen uns 30.000 afectados e afectadas, mentres que o Ministerio de Sanidade só ten previsto dar tratamento en 2015 a uns 6.000 enfermos. Vai deixar fora a miles de doentes e vai empeorar as situacións podendo parar o avance da enfermidade en miles de casos, subliñou.
Neste sentido, a deputada do Bloque quere que o ministro compareza de inmediato e se aborde esta situación atendendo Ás demandas de doentes e profesionais sanitarios. En materia sanitaria non se debe practicar a cativaría porque falamos da saúde das persoas e, polo tanto, dun dereito básico, concluíu.
