O candidato do BNG á presidencia da Xunta de Galiza, Francisco Jorquera, presentou esta mañá una iniciativa rexistrada no Congresos dos Deputados para rematar cos privilexios fiscais das confesións relixiosas, nomeadamente a Igrexa Católica.
Neste sentido, Jorquera, acompañado polo Grupo Municipal do BNG de Santiago e pola portavoz do Grupo Parlamentar do BNG, Ana Pontón, subliñou que a superación da crise económica pasa tamén por acabar cos privilexios fiscais, que xunto co enorme volume de fraude fiscal e o inxusto reparto dos impostos, que recaen sobre todo nas clases media e baixa, levaron a unha crise fiscal no Estado español.
Só o concello de Santiago deixa de recadar 200.000 euros ao ano pola exención do IBI á Igrexa
E como un primeiro paso para acabar cos privilexios fiscais, o candidato do BNG defendeu rematar cos privilexios fiscais das confesións relixiosas, unha situación que leva a que só nunha cidade como Santiago a exención do IBI ás confesións relixiosas significa que o Concello de Santiago deixa de ingresar ao ano 200.000 euros en impostos.
Unha proposta razoábel centrada nos bens destinados a fins lucrativos
Neste sentido, Francisco Jorquera salientou que a proposta do BNG é totalmente razoábel, porque é xustificable a exención do IBI cando se trata de bens inmobles destinados ao culto relixioso, como é o caso da catedral de Santiago, ou cando teñen usos sociais, caso dos comedores sociais, ou educativos, pero cremos que é totalmente inxustificábel esa exención cando afecta a bens inmobles con fins lucrativos, como por exemplo a hospedaría de San Martiño Pinario, pois iso ademais constitúe unha competencia desleal aos empresarios do sector hoteleiro, que si cumpren co pago dos seus impostos.
Mesmo en Italia a Igrexa terá que pagar o IBI
Francisco Jorquera puxo como exemplo que apoia a reclamación do BNG o caso de Italia, un país no que existe unha influencia tan grande da Igrexa Católica e no que esta terá que pagar o IBI a partir do ano que ven. Ademais lembrou que a Unión Europea no seu momento instou ao Estado español a eliminar a exención que tiñan as confesións relixiosas para o pagamento do IVE.
Na mesma liña, salientou que todos os datos indican que a inmensa maioría dos crentes apoian esta petición e cren que é de xustiza e equidade social acabar cos privilexios fiscais das confesións relixiosas.
O BNG foi a primeira forza en reclamar a fin dos privilexios fiscais para as confesións relixiosas
Por último, Francisco Jorquera lembrou que o BNG foi a primeira forza política en plantexar esta cuestión tanto no Concello de Santiago, como no Parlamento Europeo e no Congreso dos Deputados.
