A deputada Tereixa Paz asegurou que o contido foi modificado e avanza na mellora da transparencia pero segue adolecendo de eivas sobre as sancións contra posíbeis abusos da Administración e non impide as portas xiratorias
A parlamentaria do BNG, Tereixa Paz lembrou que no debate de toma de consideración da lei de transparencia o BNG formulou unha emenda de devolución do texto por estar radicalmente en contra do seu contido e considerala insuficiente para dar resposta ás necesidades de transparencia da sociedade actual pero a pesar de mellorar substancialmente, no tramite posterior, incorporando algunhas das emendas da oposición, anunciou que o BNG se abstería na votación por considerar que algúns aspectos da lei "son moi custionabeis".
Tereixa Paz valorou que a lei permita a información sobre as subvencións a empresas para que un volume tan grande de recursos públicos non quede fora de control e o avance, grazas as transaccións coa oposición sobre o funcionamento da administración coa obriga de publicar as axendas institucionais de altos cargos. Pero aínda así, dixo, a lei adoece de eivas.
Críticas do BNG ao texto
Ademais dos avances polas emendas da oposición e transaccións sobre o bo goberno, dixo a nacionalista, a lei contempla o silencio administrativo negativo cando a cidadanía solicita información e iso non conta con ningún tipo de consecuencia sancionadora a aquelas persoas que deliberadamente incumpran o dereito ou vulneran o dereito de información.
Se de verdade cremos, dixo, que ten que haber unha lei en materia de transparencia debe respectar os dereitos dos cidadáns e o seu dereito a fiscalizar algunha actuación dos poderes públicos e o destino dos recursos públicos.
Esta é a discrepancia que mantén o BNG con este proxecto de lei, afirmou a nacionalista ao que sumou as famosas portas xiratorias e a relación entre o público e o privado. No que atinxe ás incompatibilidades dos altos cargos, dixo, mantemos unha emenda para suprimir a compatibilización da actividade docente co cargo público , agás de maneira puntual e cuestionamos a limitación para que un cargo público poda volver a unha empresa co que mantivo algún tipo de relación estando ao fronte do goberno. Non é o mesmo ter o 10% dun bufete de avogados que un 10 por cento en ACCIONA, concluíu.
