O deputado do BNG, Daniel Rodas defendeu unha Proposición non de lei para pedir que a corporación de RTVE restitúa as emisións de onda corta de Radio Exterior de España
Pleno.- O parlamentario nacionalista afirmou na súa intervención que a emisora é un vínculo de familiaridade e unha voz amiga para os españois que están fora entre os que destacou a mariñeiros, emigrantes e cooperantes para quen a radio resulta esencial á hora de proporcionarlles a actualidade informativa sobre o seu país de orixe.
Na defensa da iniciativa Rodas aludiu ás informacións sobre a expulsión de Mauritania da flota cefalopodeira e diversas noticias que mantiveron en todo momento informados aos mariñeiros galegos. Rodas, mesmo leu parte dunha carta remitida por unha monxa misioneira destinada no Congo na que pedía a restitución da onda corta para seguir mantendo un contacto coa realidade política e social, cortar esta conexión, dixo o nacionalista, é cortar co dereito a conectarse co seu país.
Pola súa parte, o portavoz de pesca do Partido popular, Xosé Manuel Balseiro cualificou de error a decisión de silenciar a onda corta que ofrecía un servizo útil e eficaz sobre todo aos mariñeiros obrigados a pasar longas temporadas no mar e anunciou o voto favorábel do PP á iniciativa nacionalista por considerar que defende o único canal posíbel de sintonizar en calquera parte do mundo.
O deputado do BNG, agradeceu o apoio dos grupos parlamentarios así como da Federación de periodistas de España, a Agrupación de palangreiros, diversos colectivos de comunicación e do mar, radioescoitas e organizacións sindicais que defenderon a restitución deste servizo.
Rodas tamén fixo un chamamento a transformar as palabras en feitos, en alusión ao acordo parlamentario acadado de maneira unánime hoxe no Parlamento para reclamar a emisión en onda corta de Radio Exterior de España.