A deputada censurou que os concellos carezan de presenza nos órganos de Goberno da Axencia Galega de Servizos, responsábel de mudar as condicións dos convenios para a xestión e financiamento e de mudar as condicións dos convenios asinados no seu día co Consorcio
A deputada do BNG, Carme Adán reclamou hoxe, a través dunha Proposición non de lei suspender o proceso iniciado pola Consellería de Traballo e Benestar para formalizar os novos convenios entre a Axencia Galega de Servizos Sociais e os concellos para a xestión e financiación de equipamentos de servizos sociais.
Na proposta, Adán tamén reclamou que FEGAMP e Comisión Galega de Cooperación Local establezan os criterios para os novos convenios así como manter as condicións pactadas entre os concellos e o Consorcio Galego de Igualdade e Benestar até o remate do período pactado.
Convenios de Servizos sociais non consensuados cos concellos
Tras a intervención da portavoz do PP, Marta Rodríguez, a nacionalista replicou que a lei do 2008 non establece que o Consorcio Galego de Igualdade sexa asumido pola Axencia Galega de Servizos de Benestar e en ningún artigo aparece esa integración, pero vostedes, explicou, decidiron ese cambio no 2013. Os convenios non foron consensuados cos concellos porque foron remitidos por carta pola conselleira a cada alcalde ou alcaldesa, polo tanto, de maneira unilateral, explicou.
A parlamentaria insistiu que os concellos piden suspender o proceso e abrir unha negociación entre a FEGAMP e Corporación Galega de Cooperación Local para asegurar o mantemento das condicións asinadas ata o 2016-17 e 2018. Ademais, dixo, existe outro problema ao informar aos concellos que non teñen a obriga de asinar os novos convenios, sobre todo no que atinxe ás escolas infantís a pesar de que non é en ningún caso unha competencia municipal.
A deputada demandou o voto favorable á iniciativa nacionalista que apela o diálogo entre concellos e Goberno galego na procura da mellor forma de xestionar un mapa de servizos sociais que vostedes, criticou, están a utilizar como chantaxe.
Adán concluíu a súa intervención acusando ao Partido popular de sectarismo político por disolver o Consorcio de Igualdade e lamentou o voto contrario do Partido popular á proposta do BNG.