O grupo parlamentar do BNG, a través das súas deputadas Ana Pontón e Montse Prado, quer denunciar a cobertura informativa feita pola TVG do debate de investidura de Feijóo, pois obviou retransmitir en directo a valoración dos distintos voceiros.
As deputadas nacionalistas rexistraron unha iniciativa preguntando polas razóns que levaron á dirección da CRTVG a non efectuar a dita retransmisión, un feito sorprendente que contrasta co funcionamento habitual de calquera televisión pública en debates destas características.
A CRTVG vulnera a legalidade vixente e segue a funcionar como un apéndice ao servizo do goberno e do PP
Lamentamos engaden- que a dirección da CRTVG siga mantendo unha liña de actuación que claramente está situada na ocultación da pluralidade da sociedade galega, funcionando como un apéndice ao servizo do goberno e do PP.
Para as parlamentares, o acontecido hoxe co debate é unha clara vulneración da legalidade vixente e das obrigas que ten un medio público de funcionar baixo parámetros democráticos.
Asemade, Pontón e Prado advirten de que este tipo de prácticas tamén danan a credibilidade e valoración social que teñen os cidadáns da Compañía de titularidade pública.
