A deputada do BNG no Congreso, Rosana Pérez, solicitou a comparecencia da Ministra de Fomento ante as novas subas de peaxes que vai aprobar para xaneiro de 2013.
Ademáis, quer que Ana Pastor explique se realizou algunha xestión diante da concesionaria AUDASA para que aprobe un Programa de Descontos para a AP-9, e para que diga se exixiu á concesionaria a prestación dun servizo óptimo.
O BNG ten pendentes de debate dúas proposicións sobre a AP-9
A deputada do BNG ten rexistradas dúas proposicións non de lei relativas á AP-9: unha sobre a necesidade de aprobar canto antes un programa de descontos da AP-9, e outra relativa á necesidade de exixir á AUDASA a mellora do servizo da AP-9.
Rosana Pérez lembra que o Congreso aprobou en marzo de 2011 unha proposición non de lei do BNG cando gobernaba o anterior Goberno e que contou cos votos favorábeis do actual partido no Goberno, e na que instábamos a Fomento a realizar as xestións necesarias ante AUDASA para aprobar un programa de descontos a similitude do que ofrecen outras concesionarias.
A deputada do BNG ten pendente de debate unha nova proposición na que insta ao Ministerio a iniciar de imediato un proceso negociador coa concesionaria a fin de que ofreza aos usuarios un Programa de Descontos.
Son inconcebíbeis máis aumentos
Máis, á luz dos feitos, nen o anterior Goberno nen o actual fixeron nada para que a AP-9 conte cuns descontos como os que se aplican noutras autoestradas. A deputada do BNG critica que a Ministra de Fomento vaia aprobar máis subas a partir de xaneiro de 2013 cando xa neste ano encareceu significativamente as peaxes. Será o cuarto incremento nos prezos das peaxes nun ano, unha auténtica barbaridade.
O prezo da peaxe entre Vigo e A Coruña é desmesurado. Actualmente o traxecto entre ambas cidades se sitúa en 14,35 euros e co aumento de xaneiro de 2013 pode pasar a custar máis de 15 euros, advirte. Para a deputada do BNG é inconcebíbel que a Ministra de Fomento siga aprobando subas e subas de peaxes nunha autoestrada que resulta xa prohibitiva, circunstancia que está desviando moito tráfico a antigas estradas moi deterioradas e que non constitúen alternativas no seu estado actual.
Por riba, denuncia Rosana Pérez, a AP-9 é a única autoestrada que non conta cun programa de descontos que axudaría aos sectores sociais máis desfavorecidos, e aos usuarios habituais que deben transitar por ela varias veces ao día por motivos laborais.
Ademáis, a deputada nacionalista pón de manifesto que AUDASA non da un servizo acorde aos desmesurados prezos de peaxes que cobra. Así le lembra os significativos bloqueos e atascos producidos nas cabinas de cobro da AP-9 este verán que suscitou innumerábeis protestas da cidadanía. Neste sentido, a deputada do BNG ten pendente de debate unha proposición non de lei que insta ao Goberno a demandar a AUDASA o levantamento das barreiras das cabinas de cobro cando se produzan situacións de atascos e a exixirlle a prestación dun servizo eficaz e de calidade.
