O deputado do BNG, Daniel Rodas pediu que o Parlamento cumpra o acordo parlamentario do ano 2011 para acondicionar o porto, impedir a súa incidencia no areal e garantir as condicións de atraque e fondeo con seguranza para embarcacións e mariñeiros
O portavoz de Pesca do BNG, Daniel Rodas recriminou hoxe ao PP por seguir mareando a perdiz ao anunciar o voto negativo á Proposición non de lei nacionalista amparándose nas medidas que mañá decidirán o Concello de Laxe e Portos de Galiza.
Para o deputado, non é de recibo que o PP no Parlamento vote en contra de adoptar de inmediato medidas oportunas para modificar as condicións do porto e reprochou o seu desleixo nun momento no que os continuos temporais agravan a situación para a flota e mariñeiros.
Rodas acusou ao Goberno galego de non ter feito nada nestes anos para resolver un problema que se agrava coa aparicións e consecuencias dos temporais, basta xa de fogos de artificio, manifestou.
Os mariñeiros de Laxe levan tempo demandando as melloras do porto e seguen agardando pola resposta do Partido popular e do Goberno galego para que destine o financiamento necesario poñendo os cartos en riba da mesa espetou o nacionalista á portavoz do PP, María Soledad Piñeiro despois de ter anunciado o voto en contra dos conservadores á iniciativa do BNG.
Na quenda de réplica, o deputado do BNG comparou o compromiso do Presidente da Xunta, Alberto Núñez Feijóo co Santuario de Muxía xa e cos cartos que fagan falta mentres deixa ao pairo aos mariñeiros de Laxe que diariamente nas operacións de atraque e fondeo corren graves riscos e mesmo poñen en perigo a súa vida.
